પવિત્ર અમરનાથ યાત્રા શરૂ થવામાં હવે ગણતરીના દિવસો બાકી છે, ત્યારે સુરક્ષા એજન્સીઓને પાકિસ્તાન પ્રેરિત એક મોટા આતંકવાદી ષડયંત્ર અંગે મહત્વપૂર્ણ ગુપ્ત માહિતી મળી છે. પાકિસ્તાન સ્થિત આતંકવાદી હેન્ડલર્સ ડ્રોન મારફતે સાંબા અને કઠુઆ સેક્ટરમાં શસ્ત્રો અને દારૂગોળાનો જથ્થો મોકલીને યાત્રા દરમિયાન આતંક ફેલાવવાનું કાવતરું ઘડી રહ્યા હોવાનું સામે આવ્યું છે.
આતંકવાદીઓની નાપાક યોજના
ગુપ્તચર રિપોર્ટ્સ મુજબ, પાકિસ્તાનના સિયાલકોટના બડાલા ગુજરાન વિસ્તારમાં આતંકવાદી હેન્ડલર્સની શંકાસ્પદ હિલચાલ જોવા મળી છે. એવું માનવામાં આવે છે કે આ હેન્ડલર્સ આગામી બે થી ત્રણ અઠવાડિયામાં ડ્રોનનો ઉપયોગ કરીને ભારતીય સરહદમાં શસ્ત્રો ફેંકવાની યોજના બનાવી રહ્યા છે. આ હથિયારોનો ઉદ્દેશ્ય જમ્મુ અને કાશ્મીરમાં સક્રિય આતંકવાદીઓ સુધી પહોંચાડવાનો અને પવિત્ર અમરનાથ યાત્રા દરમિયાન મોટી જાનહાનિ સર્જવાનો છે.
સુરક્ષા વ્યવસ્થામાં વધારો
આ સંવેદનશીલ ઇનપુટ મળતાની સાથે જ ભારતીય સુરક્ષા એજન્સીઓ અત્યંત સતર્ક થઈ ગઈ છે. બોર્ડર સિક્યુરિટી ફોર્સ (BSF) અને જમ્મુ-કાશ્મીર પોલીસે આંતરરાષ્ટ્રીય સરહદ (IB) પર સર્ચ ઓપરેશન અને પેટ્રોલિંગ અનેકગણું વધારી દીધું છે. કોઈપણ ડ્રોન ઘૂસણખોરીને રોકવા માટે અત્યાધુનિક 'એન્ટી-ડ્રોન' ટેકનોલોજી અને ઇલેક્ટ્રોનિક દેખરેખ પ્રણાલીને સક્રિય કરી દેવામાં આવી છે. યાત્રાના સમગ્ર રૂટ, બેઝ કેમ્પ્સ અને સરહદ નજીકના સંવેદનશીલ વિસ્તારોમાં સુરક્ષાનું કડક કવચ તૈયાર કરવામાં આવ્યું છે.
યાત્રાની રૂપરેખા
શ્રી અમરનાથજી શ્રાઈન બોર્ડ (SASB) દ્વારા જાહેર કરાયેલ કાર્યક્રમ મુજબ, આ વર્ષે 57 દિવસની આ પવિત્ર યાત્રા 3 જુલાઈ, 2026 ના રોજ શરૂ થશે અને 28 ઓગસ્ટ, 2026 ના રોજ રક્ષાબંધનના પવિત્ર દિવસે 'છડી મુબારક' ની ગુફામાં સ્થાપના સાથે સમાપ્ત થશે.
આ પણ વાંચોઃ Delhi માં આતંકવાદી કાવતરાનો પર્દાફાશ, ISI ના 4 આતંકીઓ ઝડપાયા
