બિહારના મુઝફ્ફરપુરમાંથી એક અત્યંત ચોંકાવનારી ઘટના સામે આવી છે, જેમાં અદ્યતન AI (આર્ટિફિશિયલ ઈન્ટેલિજન્સ) અને ડીપફેક ટેકનોલોજીનો ઉપયોગ કરીને એક હોટેલ માલિકને હનીટ્રેપમાં ફસાવી કરોડ રૂપિયા પડાવવામાં આવ્યા છે. આ ઘટનાએ સાયબર ક્રાઈમની બદલાતી પદ્ધતિઓ સામે એક ગંભીર ચેતવણી ઉભી કરી છે.
ઘટના કેવી રીતે બની?
પટનાના એક અગ્રણી હોટેલ માલિકને અભિષેક કુમાર નામના શખ્સે તેની ગર્લફ્રેન્ડ અને ચાર સાથીદારો સાથે મળીને ટાર્ગેટ કર્યા હતા. આરોપીઓએ AI અને ડીપફેક ટેકનોલોજીનો સહારો લઈને વેપારીના અશ્લીલ ફોટા અને વીડિયો તૈયાર કર્યા હતા. ત્યારબાદ આ નકલી વીડિયો વાયરલ કરવાની ધમકી આપીને તેને બદનામીનો ડર બતાવી કુલ 1 કરોડ રૂપિયાની ખંડણીની માગણી કરવામાં આવી હતી. ડરના માર્યા વેપારીએ વિવિધ વ્યક્તિઓ પાસેથી ઉછીના પૈસા લઈને ચાર હપ્તામાં કુલ 97 લાખ રૂપિયા આરોપીઓને ચૂકવી દીધા હતા.
ટ્રેકર બન્યું પોલીસનું મુખ્ય હથિયાર
આરોપીઓની સતત વધતી જતી માંગણીઓથી કંટાળીને વેપારીએ પોતાના પરિવારની સલાહ લીધી અને પોલીસનો સંપર્ક કર્યો. છેલ્લો હપ્તો ચૂકવતી વખતે વેપારીએ ખૂબ જ સાવચેતીપૂર્વક 20 લાખ રૂપિયાના બંડલમાં 10,000 રૂપિયાનો જીપીએસ (GPS) ટ્રેકર છુપાવી દીધો હતો. 15 જુલાઈના રોજ પૈસા સોંપ્યા બાદ તરત જ તેમણે પોલીસને જાણ કરી. શહેર એસપી મોહિબુલ્લાહ અન્સારીના નેતૃત્વમાં રચાયેલી સ્પેશિયલ ટીમે ટ્રેકરના લોકેશનને આધારે અહિયાપુર વિસ્તારના એક ઘર પર દરોડો પાડ્યો હતો. દરોડા દરમિયાન પોલીસે ૨૦ લાખ રૂપિયા રોકડ અને ટ્રેકરવાળી બેગ કબજે કરી હતી, જોકે મુખ્ય આરોપી અભિષેક ફરાર થવામાં સફળ રહ્યો હતો.
વર્તમાન તપાસની સ્થિતિ
આ મામલે બે વ્યક્તિઓની અટકાયત કરવામાં આવી છે અને તેમની કડક પૂછપરછ ચાલી રહી છે. પોલીસ બાકીના આરોપીઓને ઝડપી લેવા માટે સતત દરોડા પાડી રહી છે. તપાસમાં બહાર આવ્યું છે કે આ ગેંગે વેપારીને કેવી રીતે જાળમાં ફસાવ્યો હતો. પોલીસે આ મામલે આવકવેરા વિભાગને પણ જાણ કરી છે.
આધુનિક ટેકનોલોજીના જમાનામાં સાવચેતી જરૂરી
આ ઘટના સાબિત કરે છે કે સોશિયલ મીડિયા અને આધુનિક ટેકનોલોજીના જમાનામાં કેટલી સાવચેતી રાખવાની જરૂર છે. અજાણ્યા લોકો સાથેના સંપર્ક અને ડિજિટલ વ્યવહારોમાં નાગરિકોએ સતર્ક રહેવું અનિવાર્ય છે. પોલીસ વેપારીની સુરક્ષા અને આરોપીઓને કાયદાના દાયરામાં લાવવા માટે તમામ પ્રયાસો કરી રહી છે.
આ પણ વાંચોઃ Jammu Kashmir Weather: રાજૌરીમાં ભારે વરસાદનો કહેર, અનેક વાહનો તણાયા, એકનું મોત
