આગામી 12-13 સપ્ટેમ્બર, 2026 ના રોજ રાષ્ટ્રીય રાજધાની નવી દિલ્હી સ્થિત પ્રખ્યાત ભારત મંડપમ ખાતે 18મી બ્રિક્સ સમિટનું ભવ્ય આયોજન કરવા માટે ભારત સંપૂર્ણપણે તૈયાર છે. આ વર્ષે ભારત બ્રિક્સનું અધ્યક્ષપદ સંભાળી રહ્યું છે, જે વૈશ્વિક સ્તરે દેશની વધતી કૂટનીતિક તાકાત દર્શાવે છે. આ મહત્વપૂર્ણ શિખર સંમેલનની થીમ "શક્તિ, નવીનતા, સહયોગ અને ટકાઉપણું માટે નિર્માણ" રાખવામાં આવી છે, જેમાં બ્રિક્સ સભ્ય દેશો તેમજ ભાગીદાર રાષ્ટ્રોના ટોચના નેતાઓ ભાગ લેશે.
ભારતની અધ્યક્ષતા અને વ્યાપક આયોજન
બ્રિક્સ તેની સ્થાપનાના 20 વર્ષ પૂરા કરી રહ્યું છે અને ભારત ચોથી વખત આ જૂથનું પ્રમુખપદ સંભાળી રહ્યું છે. આ વર્ષની અધ્યક્ષતા અંતર્ગત ભારતના ૨૫થી વધુ શહેરોમાં ૩૫૦થી વધુ ઉચ્ચ-સ્તરીય બેઠકો યોજાઈ ચૂકી છે. આ કડીમાં બ્રિક્સના નાણાં પ્રધાનો અને સેન્ટ્રલ બેંક ગવર્નરોની અંતિમ મહત્વપૂર્ણ બેઠક ૯-૧૦ સપ્ટેમ્બર દરમિયાન મુંબઈમાં યોજાઈ રહી છે, જે સમિટના થોડા દિવસો પહેલા આર્થિક સહયોગને વધુ મજબૂત બનાવશે.
બ્રિક્સ શું છે અને તેનું મહત્વ?
૨૦૦૬માં અનૌપચારિક જૂથ તરીકે શરૂ થયેલું બ્રિક્સ આજે વિશ્વના ૧૧ મુખ્ય વિકાસશીલ અને ઉભરતા દેશોનું શક્તિશાળી મંચ બની ગયું છે. જેમાં ભારત, ચીન, રશિયા, બ્રાઝિલ, દક્ષિણ આફ્રિકા ઉપરાંત ઇજિપ્ત, ઇથોપિયા, ઇન્ડોનેશિયા, ઈરાન, સાઉદી અરેબિયા અને યુએઈનો સમાવેશ થાય છે. આ જૂથ યુએન (UN), આઈએમએફ (IMF) અને વિશ્વ બેંક જેવી વૈશ્વિક સંસ્થાઓમાં સુધારાની માંગણી સતત કરતું રહ્યું છે જેથી ઉભરતી અર્થવ્યવસ્થાઓને યોગ્ય પ્રતિનિધિત્વ મળી શકે.
ભારત માટે આ સમિટ કેમ ખાસ છે?
ભારત માટે આ સમિટ અનેકવિધ દ્રષ્ટિએ અત્યંત મહત્વપૂર્ણ છે. તે ભારતને અમેરિકા, યુરોપ અને પશ્ચિમી દેશો સાથેના સંબંધો જાળવી રાખીને ચીન અને રશિયા જેવા મોટા દેશો સાથે એક જ મંચ પર જોડવાની અનન્ય તક પૂરી પાડે છે. આ સમિટ દ્વારા ભારત ગ્લોબલ સાઉથ (વિકાસશીલ વિશ્વ) ના અવાજ તરીકે પોતાની સ્થિતિ વધુ મજબૂત કરી શકે છે. ખાસ કરીને, ચીનના રાષ્ટ્રપતિ શી જિનપિંગની આ સમિટમાં ઉપસ્થિતિ ભારત-ચીન દ્વિપક્ષીય સંબંધોના સંચાલન માટે પણ ખૂબ જ મહત્વપૂર્ણ સાબિત થઈ શકે છે.
આ પણ વાંચોઃ 50% Tariff On US: લો બોલો! અન્ય દેશો પર ટેરિફ લગાવનારાં ટ્રમ્પના દેશ પર જ લગાવી દીધો 50% ટેરિફ
