મેરિકા અને કેનેડા વચ્ચે લાંબા સમયથી ચાલી રહેલો વેપાર તણાવ હવે ખુલ્લા વેપાર યુદ્ધમાં ફેરવાઈ ગયો છે. અમેરિકી રાષ્ટ્રપતિ ડોનાલ્ડ ટ્રમ્પ દ્વારા કેનેડિયન માલ પર વધારાના કરવેરાની જાહેરાત કરવામાં આવ્યા બાદ, કેનેડાએ પણ વળતો પ્રહાર કરતા સેંકડો યુએસ ઉત્પાદનો પર ૫૦ ટકા સુધીનો ભારે ટેરિફ લાદી દીધો છે. ગત મહિને બંને દેશો વચ્ચે વેપાર વાટાઘાટો નિષ્ફળ ગયા પછી આ સ્થિતિ વધુ વણસી છે.

કેનેડાનો મોટો પલટવાર

મળતી માહિતી મુજબ, કેનેડાએ અંદાજે 27.6 અબજ કેનેડિયન ડોલર મૂલ્યના ૭૦૦થી વધુ યુએસ ઉત્પાદનો પર ૧૫ ટકાથી લઈને ૫૦ ટકા સુધીનો ટેરિફ ઝીંક્યો છે. આ યાદીમાં ડેરી ઉત્પાદનો, કૃષિ સાધનો, કાગળ, ઘરગથ્થુ ઉપકરણો અને ઈલેક્ટ્રોનિક્સ સાધનોનો સમાવેશ થાય છે. આ ઉપરાંત, યુએસ સ્ટીલ, એલ્યુમિનિયમ અને લોખંડના ઉત્પાદનો પરનો ટેરિફ વધારીને સીધો બમણો એટલે કે ૫૦ ટકા કરી દેવામાં આવ્યો છે. ફર્નિચર, મોટરસાઇકલ, કપડાં અને કેટલાક સૌંદર્ય પ્રસાધનો પણ આ ભારે ટેરિફના દાયરામાં આવે છે. કેનેડાના નાણા વિભાગે સ્પષ્ટ કર્યું છે કે આ કડક પગલું તેના પોતાના કામદારો, ઉત્પાદકો અને સ્થાનિક ઉદ્યોગોના રક્ષણ માટે લેવામાં આવ્યું છે.

અમેરિકાની પ્રતિક્રિયા અને ટ્રમ્પના નવા નિર્ણયો

કેનેડાના આ આક્રમક પગલાથી નારાજ થઈને યુએસ પ્રમુખ ડોનાલ્ડ ટ્રમ્પે કેનેડા પર વેપારમાં ભેદભાવ કરવાનો ગંભીર આરોપ મૂક્યો છે. જવાબી કાર્યવાહીના ભાગરૂપે, અમેરિકાએ આગામી ૧૫ સપ્ટેમ્બરથી વધુ કેનેડિયન ઉત્પાદનો પર ટેરિફ વિસ્તારવાની અને ૨૯ સપ્ટેમ્બરથી કેનેડાના કેટલાક ડેરી ઉત્પાદનો, મોટરસાઇકલ તેમજ આલ્કોહોલિક પીણાંની આયાત પર સંપૂર્ણ પ્રતિબંધ મૂકવાની જાહેરાત કરી છે.

દ્વિપક્ષીય વેપારનું કદ

અમેરિકા અને કેનેડા વચ્ચે અબજોનો મોટો આયાત-નિકાસ વેપાર થાય છે. યુએસ ટ્રેડ રિપ્રેઝન્ટેટિવના આંકડા મુજબ, ૨૦૨૫માં અમેરિકાએ કેનેડામાં ૩૩૩.૬ અબજ ડોલરની નિકાસ કરી હતી, જ્યારે કેનેડામાંથી ૩૮૧.૯ અબજ ડોલરના માલની આયાત કરી હતી. બંને દેશો ઊર્જા, વાહનો, ભારે મશીનરી, ફાર્માસ્યુટિકલ્સ અને ખાદ્ય પદાર્થો જેવા મુખ્ય ક્ષેત્રોમાં પરસ્પર ગાઢ વેપાર ધરાવે છે. જો કે, આ નવો ટેરિફ વિવાદ વૈશ્વિક અર્થતંત્ર અને બંને દેશોના બજારો માટે મોટો ફટકો સાબિત થઈ શકે છે.

આ પણ વાંચોઃ Strait of Hormuz માં તણાવ ચરમ સીમાએ, અમેરિકાએ ઇરાનના 5 ઓઇલ ટેન્કરને ઉડાવ્યા