કેન્દ્ર સરકારે ખાંડ ક્ષેત્રને લઈને મહત્વપૂર્ણ નિર્ણય લીધો છે. વાણિજ્ય અને ઉદ્યોગ મંત્રાલયના ડાયરેક્ટર જનરલ ઓફ ફોરેન ટ્રેડ (DGFT) દ્વારા જાહેર કરાયેલા નોટિફિકેશન મુજબ, Tariff Rate Quota (TRQ) યોજના હેઠળ 10 લાખ મેટ્રિક ટન સુધી કાચી ખાંડની ડ્યુટી ફ્રી આયાતને મંજૂરી આપવામાં આવી છે. આ સુવિધા 31 ઓક્ટોબર 2026 સુધી લાગુ રહેશે.
સરકારે કાચી ખાંડની આયાત નીતિમાં સુધારો કર્યો છે. નોટિફિકેશન અનુસાર, 10 લાખ મેટ્રિક ટન સુધીની આયાત નિર્ધારિત TRQ દર હેઠળ ડ્યુટી ફ્રી કરવામાં આવી છે. આ નિર્ણયથી ખાંડના સ્થાનિક બજારમાં સપ્લાય વધારવામાં અને ઉપલબ્ધતા જાળવી રાખવામાં મદદ મળી શકે છે. નોટિફિકેશનમાં Advance Authorisations હેઠળ અગાઉથી જારી થયેલા કેટલાક SION E52 સંબંધિત કેસો માટે પણ મહત્વપૂર્ણ જોગવાઈ કરવામાં આવી છે. આવા કિસ્સાઓમાં ખાંડની આયાત માટે આપવામાં આવેલી Advance Authorisationને TRQ યોજના હેઠળ કન્વર્ઝન કરવાની એક વખતની સુવિધા આપવામાં આવશે. જોકે, આ માટે નિર્ધારિત શરતોનું પાલન કરવું પડશે.
આ ઉપરાંત, આયાત કરવામાં આવેલી કાચી ખાંડને દેશમાં રિફાઈન કરીને તૈયાર કરવામાં આવે ત્યારે લાગુ પડતી GST સંબંધિત જોગવાઈઓનું પણ પાલન કરવું પડશે. નોટિફિકેશનમાં સ્પષ્ટ કરવામાં આવ્યું છે કે આયાત સમયે કાચી ખાંડ પર લાગુ GST અને બાદમાં તૈયાર ખાંડની નિકાસ સંબંધિત નિયમો મુજબ પ્રક્રિયા હાથ ધરાશે.
DGFTને TRQ અને Advance Authorisationના કન્વર્ઝન માટેની પ્રક્રિયા નક્કી કરવાની જવાબદારી સોંપવામાં આવી છે. આ માટે જરૂરી પ્રક્રિયા જાહેર નોટિસ મારફતે નક્કી કરવામાં આવશે. સરકારના આ નિર્ણયથી ખાંડ ઉદ્યોગમાં કાચા માલની ઉપલબ્ધતા વધવાની શક્યતા છે. સાથે જ, સ્થાનિક બજારમાં ખાંડના ભાવ અને પુરવઠાને સ્થિર રાખવામાં પણ આ પગલું મહત્વપૂર્ણ બની શકે છે. આ નોટિફિકેશન વાણિજ્ય અને ઉદ્યોગ મંત્રીની મંજૂરી બાદ જારી કરવામાં આવ્યું છે.
આ પણ વાંચો : India-Mauritius વચ્ચે મોટી ફ્યુઅલ ડીલ, પેટ્રોલ-ડીઝલ-ATF સપ્લાય કરશે દેશ