ભારત અને મોરિશિયસ વચ્ચે એનર્જી સેક્ટરમાં મહત્વપૂર્ણ કરાર થયો છે. મોરિશિયસ સરકારે ગુરુવારે જણાવ્યું કે ભારતે મોરિશિયસને પેટ્રોલ, ડીઝલ અને એવિએશન ફ્યુઅલ જેવા રિફાઈન્ડ પેટ્રોલિયમ ઉત્પાદનોની સપ્લાય માટે લાંબા ગાળાનો કરાર કર્યો છે. પશ્ચિમ એશિયામાં ચાલી રહેલા સંઘર્ષ અને તેના કારણે વૈશ્વિક એનર્જી સપ્લાયમાં સર્જાયેલા વિક્ષેપો વચ્ચે આ કરાર મોરિશિયસની ઊર્જા સુરક્ષા માટે મહત્વપૂર્ણ માનવામાં આવી રહ્યો છે.
નાણાકીય શરતો જાહેર કરાઈ નથી
આ કરારો કેન્દ્રીય પેટ્રોલિયમ અને નેચરલ ગેસ મંત્રી હરદીપ પુરીની મોરિશિયસ મુલાકાત દરમિયાન કરવામાં આવ્યા હતા. તેમાં ઓઈલ અને ગેસ ક્ષેત્રે સહયોગ માટે સરકાર-થી-સરકાર MoU તેમજ ઈન્ડિયન ઓઈલ કોર્પોરેશન સાથે ખરીદી-વેચાણ કરારનો સમાવેશ થાય છે. જોકે, બંને દેશોએ સપ્લાયના જથ્થા તેમજ વ્યાવસાયિક અને નાણાકીય શરતો જાહેર કરી નથી.
વિક્ષેપોની અસર વૈશ્વિક તેલ સપ્લાય પર પડી
હરદીપ પુરીએ જણાવ્યું કે મોરિશિયસ દક્ષિણ એશિયાની બહારનો પ્રથમ દેશ છે, જેણે ભારતીય સરકારી ઓઈલ કંપની સાથે આ પ્રકારનો કરાર કર્યો છે. આ વ્યવસ્થા આ વર્ષની શરૂઆતમાં બંને દેશો વચ્ચે થયેલી ચર્ચાના આધારે તૈયાર થઈ છે. વિદેશ મંત્રી એસ. જયશંકરે પણ અગાઉ જણાવ્યું હતું કે પશ્ચિમ એશિયા સંકટે ઊર્જા ક્ષેત્રમાં વ્યૂહાત્મક ભાગીદારીના મહત્વને વધુ સ્પષ્ટ કર્યું છે. ખાસ કરીને હોર્મુઝ સ્ટ્રેટ આસપાસના સંઘર્ષ અને વિક્ષેપોની અસર વૈશ્વિક તેલ સપ્લાય તથા ક્રૂડ ઓઈલના ભાવ પર પડી રહી છે.
બાયોફ્યુઅલ ક્ષેત્રે પણ સહયોગ
ભારત અને મોરિશિયસ વચ્ચે ઊર્જા સહયોગનો વ્યાપ રિન્યુએબલ એનર્જી સુધી પણ વિસ્તરી રહ્યો છે. બંને દેશો સોલર એનર્જી અને બાયોફ્યુઅલ ક્ષેત્રે પણ સહયોગ કરી રહ્યા છે. મોરિશિયસના હેનરિએટામાં 8 મેગાવોટના સોલર પાવર પ્લાન્ટ સહિત વિવિધ પહેલમાં ભારત સહયોગ આપી રહ્યું છે. આ કરાર બંને દેશો વચ્ચેની વ્યાપક વ્યૂહાત્મક ભાગીદારીને વધુ મજબૂત બનાવે છે. ગયા વર્ષે વડાપ્રધાન નરેન્દ્ર મોદીની મોરિશિયસ મુલાકાત દરમિયાન બંને દેશોએ પોતાના સંબંધોને ‘Enhanced Strategic Partnership’ના સ્તરે લઈ જવાની જાહેરાત કરી હતી. ત્યારથી દરિયાઈ સહયોગ, આરોગ્ય, શિક્ષણ અને વિકાસ સહિતના અનેક ક્ષેત્રોમાં ભાગીદારી વધી છે.
આ પણ વાંચો : NASAના 22 વર્ષ જૂના Swift ટેલિસ્કોપનું રેસ્ક્યુ મિશન ગયું નિષ્ફળ
