ભારતને વૈશ્વિક સેમિકન્ડક્ટર મેન્યુફેક્ચરિંગ હબ બનાવવા દિશામાં સરકારે એક મહત્વપૂર્ણ પગલું ભર્યું છે. નાણાં મંત્રાલયના વ્યય વિભાગે ઈન્ડિયા સેમિકન્ડક્ટર મિશન (ISM) 2.0 માટે 1.25 લાખ કરોડ રૂપિયાના બજેટ પ્રસ્તાવને મંજૂરી આપી છે. મળતી માહિતી મુજબ આ મંજૂરી અગાઉના ISM 1.0 માટે ફાળવાયેલા 76,000 કરોડ રૂપિયાથી ઘણી વધારે છે.

પ્રસ્તાવને અંતિમ મંજૂરી માટે કેન્દ્રીય કેબિનેટ સમક્ષ રજૂ કરવામાં આવશે

વ્યય નાણાં સમિતિ દ્વારા આ ખર્ચને મંજૂરી આપવામાં આવી છે અને હવે આ પ્રસ્તાવને અંતિમ મંજૂરી માટે કેન્દ્રીય કેબિનેટ સમક્ષ રજૂ કરવામાં આવશે. આ યોજના ભારતની ચિપ મેન્યુફેક્ચરિંગ ક્ષમતાને મજબૂત બનાવવા માટે અત્યંત મહત્વપૂર્ણ માનવામાં આવી રહી છે. ફેબ્રુઆરીમાં રજૂ થયેલા બજેટમાં પણ સેમિકન્ડક્ટર મિશનના બીજા તબક્કાની જાહેરાત કરવામાં આવી હતી, જેનો મુખ્ય ઉદ્દેશ દેશમાં ચિપ ઉત્પાદનનું મજબૂત ઇકોસિસ્ટમ વિકસાવવાનો છે. તેમાં ડિઝાઈન, પ્રોડક્શન, સાધનો, સામગ્રી અને સ્વદેશી ઘટકોના વિકાસ પર ખાસ ધ્યાન આપવામાં આવશે.

12 સેમિકન્ડક્ટર પ્રોજેક્ટ્સને મંજૂરી અપાઈ

કેન્દ્રીય ઈલેક્ટ્રોનિક્સ અને આઇટી મંત્રી અશ્વિની વૈષ્ણવના જણાવ્યા મુજબ ISM 2.0 હેઠળ દેશમાં ચિપ ડિઝાઈન અને ઉત્પાદન ક્ષમતાને વધુ મજબૂત બનાવવામાં આવશે. અત્યાર સુધીમાં સરકાર દ્વારા લગભગ 1.64 લાખ કરોડ રૂપિયાના રોકાણ સાથે 12 સેમિકન્ડક્ટર પ્રોજેક્ટ્સને મંજૂરી આપવામાં આવી છે, જેમાં ફેબ્રિકેશન યુનિટ્સ, કમ્પાઉન્ડ સેમિકન્ડક્ટર યુનિટ્સ અને પેકેજિંગ યુનિટ્સનો સમાવેશ થાય છે.

આ ઉપરાંત, સેમિકન્ડક્ટર વેલ્યુ ચેઈનના વિકાસ માટે સ્પેશિયલ કેમિકલ્સ, ઈન્ડસ્ટ્રિયલ ગેસ અને હાઈ-પરફોર્મન્સ મટિરિયલ્સની માગ પણ વધશે. આ ક્ષેત્રમાં કામ કરતી Linde India, Navin Fluorine International અને Gujarat Fluorochemicals જેવી કંપનીઓને ભવિષ્યમાં મોટો લાભ મળવાની શક્યતા વ્યક્ત કરવામાં આવી રહી છે.

આ પણ વાંચો : Noel Tataનો વધુ એક મોટો નિર્ણય, ટ્રેન્ટ બાદ હવે આ કંપનીના ચેરમેન પદેથી પણ આપશે રાજીનામું