ટાટા ગ્રુપમાંથી એક મહત્વપૂર્ણ સમાચાર સામે આવ્યા છે. ટ્રેન્ટ કંપનીના ચેરમેન પદેથી રાજીનામું આપ્યાના લગભગ એક અઠવાડિયા બાદ નોએલ ટાટાએ હવે ટાટા ગ્રુપની બીજી મોટી કંપની વોલ્ટાસના ચેરમેન પદેથી પણ હટવાની જાહેરાત કરી છે. આ જાહેરાત તેમણે કંપનીની 72મી વાર્ષિક સામાન્ય સભા (AGM) દરમિયાન કરી હતી.
AGMમાં કરી જાહેરાત
શેરહોલ્ડર્સને સંબોધતા નોએલ ટાટાએ જણાવ્યું કે વોલ્ટાસના ચેરમેન તરીકે આ તેમની છેલ્લી AGM રહેશે. તેમણે કંપનીની ટીમ પર સંપૂર્ણ વિશ્વાસ વ્યક્ત કરતાં કહ્યું કે આંતરિક પ્રમોશન અને નવી નિમણૂકો દ્વારા કંપનીએ મજબૂત મેનેજમેન્ટ ટીમ તૈયાર કરી છે, જે ભવિષ્યમાં ઝડપી વૃદ્ધિ માટે સક્ષમ છે. નોએલ ટાટા 2003માં વોલ્ટાસના બોર્ડમાં જોડાયા હતા અને 2017માં તેમને નોન-એગ્ઝિક્યુટિવ ચેરમેન તરીકે નિમવામાં આવ્યા હતા. તેઓ અગાઉ ટ્રેન્ટના ચેરમેન પદેથી પણ હટી ચૂક્યા છે. ટાટા ગ્રુપના સંસ્થાપક પરિવારમાંથી એક મહત્વપૂર્ણ સભ્ય તરીકે તેમની ભૂમિકા લાંબા સમયથી નોંધપાત્ર રહી છે.
