ચંદીગઢના ઈન્ડસ્ટ્રીયલ એરિયા ફેઝ-2માં 'હોટલ ધ ફર્ન' નજીક એક બિલ્ડિંગ અચાનક ધરાશાયી થતાં મોટો અકસ્માત સર્જાયો છે. ઈમારત અચાનક ધરાશાયી થવાથી આસપાસના વિસ્તારમાં અફરાતફરી મચી ગઈ અને લોકોમાં ભયનો માહોલ જોવા મળ્યો. પ્રાથમિક માહિતી મુજબ, બિલ્ડિંગના કાટમાળ નીચે 2થી 3 લોકો ફસાયા હોવાની આશંકા છે.
ઘટનાની જાણ થતા જ પોલીસ, સ્થાનિક પ્રશાસન અને ફાયર બ્રિગેડની ટીમો તાત્કાલિક સ્થળ પર પહોંચી ગઈ હતી અને રેસ્ક્યુ ઓપરેશન શરૂ કરવામાં આવ્યું હતું. કાટમાળ નીચે ફસાયેલા લોકોને બહાર કાઢવા માટે JCB મશીનો અને બચાવ કર્મચારીઓની મદદથી કામગીરી ઝડપી ગતિએ ચાલી રહી છે. અધિકારીઓએ જણાવ્યું કે જ્યાં લોકો ફસાયા હોવાની શક્યતા છે તે વિસ્તારને ઓળખી લેવામાં આવ્યો છે અને થોડા જ સમયમાં તેમને બહાર કાઢવામાં આવી શકે છે. ઘટનાસ્થળે એમ્બ્યુલન્સ પણ તૈનાત કરવામાં આવી છે જેથી ઘાયલોને તરત જ હોસ્પિટલ પહોંચાડી શકાય.
હજુ સુધી સ્પષ્ટ નથી થઈ શક્યું કે ઘટના સમયે બિલ્ડિંગમાં કેટલા લોકો હાજર હતા. સ્થાનિક લોકોના જણાવ્યા મુજબ, ઈમારત ધરાશાયી થતાં જ જોરદાર અવાજ થયો હતો અને પછી ચીસાચીસ મચી ગઈ હતી. આસપાસના લોકોએ તરત જ બચાવ ટીમોને જાણ કરી હતી. પોલીસે સુરક્ષા કારણોસર આખા વિસ્તારને ઘેરી લીધો છે, જેથી રેસ્ક્યુ ઓપરેશનમાં કોઈ અડચણ ન આવે. બિલ્ડિંગ કયા કારણોસર ધરાશાયી થઈ તે અંગે તપાસ શરૂ કરવામાં આવી છે, પરંતુ હાલ પ્રાથમિકતા કાટમાળમાં ફસાયેલા લોકોને સુરક્ષિત બહાર કાઢવાની છે.
આ પણ વાંચો : Parliament Monsoon Session : 20 જુલાઈથી 13 ઓગસ્ટ સુધી ચાલશે સંસદનું ચોમાસુ સત્ર, રાષ્ટ્રપતિએ આપી મંજૂરી