ઉત્તરાખંડની પવિત્ર ભૂમિ પર આજે આસ્થાનો સૂર્યોદય થયો છે. અક્ષય તૃતીયાના શુભ પર્વ નિમિત્તે વિશ્વ પ્રસિદ્ધ ચારધામ યાત્રા 2026 નો વિધિવત પ્રારંભ થઈ રહ્યો છે. આજે સવારે વૈદિક મંત્રોચ્ચાર અને શંખનાદ વચ્ચે ગંગોત્રી અને યમુનોત્રી ધામના કપાટ શ્રદ્ધાળુઓ માટે ખોલી દેવામાં આવ્યા છે. આ ઐતિહાસિક ક્ષણના સાક્ષી બનવા માટે ઉત્તરાખંડના મુખ્યમંત્રી પુષ્કર સિંહ ધામી પોતે હાજર રહ્યા છે.
ગંગોત્રી અને યમુનોત્રી: યાત્રાનું પ્રથમ સોપાન
પરંપરા મુજબ, ચારધામ યાત્રાની શરૂઆત યમુનોત્રી ધામથી કરવામાં આવે છે. યમુના નદીના ઉદ્ગમ સ્થાન ગણાતા યમુનોત્રી દેવીના મંદિરને ફૂલોથી ભવ્ય રીતે શણગારવામાં આવ્યું છે. ત્યારબાદ, પવિત્ર ગંગા નદીના ઉદ્ગમ સ્થાન ગંગોત્રી ધામના દ્વાર પણ ભક્તો માટે ખોલવામાં આવ્યા છે. તાજેતરમાં થયેલી હિમવર્ષાને કારણે આ બંને ધામોની આસપાસની ટેકરીઓ બરફની સફેદ ચાદરથી ઢંકાઈ ગઈ છે, જે ભક્તો માટે અલૌકિક દ્રશ્ય રજૂ કરે છે.
કેદારનાથ અને બદ્રીનાથના દ્વાર ક્યારે ખુલશે?
જો તમે કેદારનાથ અને બદ્રીનાથના દર્શન કરવા માંગતા હોવ, તો આગામી દિવસોનું સમયપત્રક ખાસ નોંધી લેજો: કેદારનાથ ધામ: ભગવાન શિવના 12 જ્યોતિર્લિંગોમાંના એક એવા કેદારનાથ ધામના કપાટ 22 એપ્રિલે ખુલશે. બદ્રીનાથ ધામ: ભગવાન વિષ્ણુના નિવાસસ્થાન એવા બદ્રીનાથ ધામના દરવાજા 23 એપ્રિલે શ્રદ્ધાળુઓ માટે ખોલવામાં આવશે.
યાત્રા માટે રજીસ્ટ્રેશન અને સુરક્ષા વ્યવસ્થા
વહીવટીતંત્રે આ વર્ષે રેકોર્ડબ્રેક ભક્તો આવવાની શક્યતાને ધ્યાનમાં રાખીને સઘન સુરક્ષા વ્યવસ્થા કરી છે. શ્રદ્ધાળુઓ માટે નોંધણી (Registration) ફરજિયાત છે. ભક્તો હરિદ્વાર, ઋષિકેશ અથવા વિકાસનગરમાં ઓનલાઈન પોર્ટલ દ્વારા અથવા ઓફલાઈન કેન્દ્રો પર જઈને પોતાની યાત્રાનું રજીસ્ટ્રેશન કરાવી શકે છે. રસ્તાઓનું સમારકામ, આરોગ્ય સુવિધાઓ અને ભોજન-રહેવાની સગવડો પર ખાસ ધ્યાન આપવામાં આવ્યું છે જેથી કોઈને મુશ્કેલી ન પડે.
આધ્યાત્મિક મહત્વ
હિંદુ ધર્મમાં ચારધામ યાત્રાનું અત્યંત મહત્વ છે. એવું માનવામાં આવે છે કે જીવનમાં એકવાર આ યાત્રા કરવાથી તમામ પાપોમાંથી મુક્તિ મળે છે અને મોક્ષની પ્રાપ્તિ થાય છે. ગંગા, યમુના, અલકનંદા અને મંદાકિની નદીઓના કિનારે વસેલા આ ચાર પવિત્ર ધામો માત્ર ધાર્મિક દ્રષ્ટિએ જ નહીં, પરંતુ કુદરતી સૌંદર્યની દ્રષ્ટિએ પણ અદભૂત છે. આજે જ્યારે આખા દેશમાં અક્ષય તૃતીયાની ઉજવણી થઈ રહી છે, ત્યારે હિમાલયની પહાડીઓમાં ભક્તોના હરખના પૂર ઉમટ્યા છે. આગામી છ મહિના સુધી લાખો ભક્તો આ પવિત્ર ધામોમાં માથું નમાવીને આશીર્વાદ મેળવશે.
આ પણ વાંચોઃ Petrol Diesel Price Today: ક્રૂડમાં ઉછાળા છતાં ગુજરાતમાં ઈંધણના ભાવ સ્થિર? જાણો 19 એપ્રિલના લેટેસ્ટ રેટ
