ભારતના મુખ્ય ન્યાયાધીશ (CJI) જસ્ટિસ સૂર્યકાંતે લોકશાહી અને બંધારણીય સંસ્થાઓની ભૂમિકા અંગે મહત્ત્વનું નિવેદન આપ્યું છે. તેમણે કહ્યું કે લોકશાહીમાં નાગરિકોને બંધારણીય સંસ્થાઓના નિર્ણયો સામે ટીકા કરવાનો સંપૂર્ણ અધિકાર છે, પરંતુ કોઈ નિર્ણયના આધારે આખી સંસ્થાને નિશાન બનાવવી યોગ્ય નથી. તેમણે નિર્ણયની ટીકા અને સંસ્થા પર સવાલ ઉઠાવવા વચ્ચેનો તફાવત સમજવાની પણ સલાહ આપી હતી.

બંધારણીય સંસ્થાઓને જ નિશાન બનાવવાથી બચવું જોઈએ

હિમાચલ પ્રદેશના ધર્મશાળામાં હિમાચલ પ્રદેશ સેન્ટ્રલ યુનિવર્સિટીના 10મા પદવીદાન સમારોહમાં મુખ્ય અતિથિ તરીકે હાજર રહેલા CJI જસ્ટિસ સૂર્યકાંતે વિદ્યાર્થીઓ સાથે સંવાદ કર્યો હતો. આ દરમિયાન તેમણે કહ્યું કે લોકશાહીમાં નાગરિકોને બંધારણીય સંસ્થાઓના નિર્ણયો સામે અસંમતિ વ્યક્ત કરવાનો અને તેની ટીકા કરવાનો અધિકાર છે. જોકે, કોઈ નિર્ણય સાથે અસહમતિ હોય તો તેના આધારે આખી સંસ્થાને જ નિશાન બનાવવી જોઈએ નહીં.CJI સૂર્યકાંતે કહ્યું કે કોઈ સંસ્થાના નિર્ણય અને તે સંસ્થા વચ્ચેનો તફાવત સમજવો જરૂરી છે. ઘણી વખત લોકો સંસ્થાના કોઈ એક નિર્ણયને લઈને સંસ્થા પર જ સવાલ ઉઠાવવા લાગે છે. આવી માનસિકતા લોકશાહીને મજબૂત બનાવતી સંસ્થાઓ પ્રત્યે સામાન્ય નાગરિકોના વિશ્વાસને નબળો પાડી શકે છે. લોકશાહીમાં અસંમતિ અને ટીકાને સ્થાન હોવું જોઈએ, પરંતુ સંસ્થાઓની વિશ્વસનીયતા જાળવવી પણ એટલી જ જરૂરી છે.

સફળતા માટે પરિવાર અને શિક્ષકોનો સહયોગ જરૂરી

પદવીદાન સમારોહને સંબોધિત કરતાં જસ્ટિસ સૂર્યકાંતે વિદ્યાર્થીઓને જીવનમાં સફળતા મેળવવા માટે ધીરજ અને સતત પ્રયાસો કરતા રહેવાની સલાહ આપી હતી.હિમાલયના પહાડોનું ઉદાહરણ આપતાં તેમણે કહ્યું કે પહાડોની ટોચ સુધી પહોંચવાનો રસ્તો ભાગ્યે જ સીધો હોય છે. તેવી જ રીતે જીવનમાં સફળતા મેળવવાનો માર્ગ પણ હંમેશાં સરળ હોતો નથી. તેના માટે સતત મહેનત, ધીરજ અને મુશ્કેલીઓનો સામનો કરવાની ક્ષમતા જરૂરી છે. CJIએ વિદ્યાર્થીઓને યાદ અપાવ્યું હતું કે કોઈ વ્યક્તિ એકલા હાથે પહાડની ચઢાઈ પૂર્ણ કરી શકતી નથી. તેવી જ રીતે જીવનમાં આગળ વધવા માટે પરિવાર, શિક્ષકો, મિત્રો અને સમાજનો સહયોગ અત્યંત મહત્ત્વનો છે.તેમણે કહ્યું કે ડિગ્રી મેળવ્યા બાદ વિદ્યાર્થીઓ સામે નવી તકોની સાથે નવી જવાબદારીઓ પણ આવે છે. યુવાનોએ પોતાના જ્ઞાન અને ક્ષમતાનો ઉપયોગ માત્ર વ્યક્તિગત સફળતા માટે નહીં, પરંતુ સમાજના હિત અને વિકાસ માટે પણ કરવો જોઈએ.

આ પણ વાંચોઃ Jamnagar News: અમદાવાદના આસિસ્ટન્ટ ઓડિટ ઓફિસરને 8 લાખની લાંચ લેતાં ACBએ ઝડપી પાડ્યા