દિલ્હી પોલીસે જંતર-મંતર પર વિરોધ પ્રદર્શન કરવા બદલ કોકરોચ જનતા પાર્ટી (CJP) ના નેતાઓ વિરુદ્ધ કાર્યવાહી કરી છે. સૌરવ દાસ, આશુતોષ રંક અને અજિંક્ય શિંદેની સાવચેતીના પગલા તરીકે ધરપકડ કરવામાં આવી છે. અગાઉ, પોલીસે સૌરવ દાસ, આશુતોષ રંક અને સંગઠનના અન્ય સભ્યો વિરુદ્ધ જંતર-મંતર વિસ્તારમાં પરવાનગી વિના પ્રવેશ કરવાના આરોપસર FIR દાખલ કરી હતી. ત્રણેયને SEM કોર્ટમાં રજૂ કરવામાં આવ્યા, જ્યાં તેમને 5 દિવસ માટે જ્યુડિશિયલ કસ્ટડીમાં મોકલાયા છે.
ત્રણેય નેતાને જેલ
કોકરોચ જનતા પાર્ટીના કાનૂની વડા રત્ના સિંહે X પર પોસ્ટ કરીને કહ્યું, "હમણાં જ માહિતી મળી કે સૌરવ, આશુતોષ અને અજિંક્યને એક કલાકની અંદર મંદિર માર્ગ પોલીસ સ્ટેશનમાં SEM સમક્ષ રજૂ કરવામાં આવશે. 24 કલાકની સમયમર્યાદા સમાપ્ત થવા જઈ રહી છે." પોલીસ અધિકારીઓના જણાવ્યા અનુસાર, FIRમાં શાંતિ જાળવવા માટે અગાઉ આપવામાં આવેલા શાંતિ બંધનની શરતોના ઉલ્લંઘન સંબંધિત કલમો પણ શામેલ છે. CJP કાર્યકરો ભારે બેરિકેડવાળા જંતર-મંતર વિસ્તારમાં પ્રવેશ્યા અને મુખ્ય ચૂંટણી કમિશનર જ્ઞાનેશ કુમારના રાજીનામાની માંગણી કરતા સૂત્રોચ્ચાર કર્યા ત્યારે આ કાર્યવાહી થઈ.
ત્રણેય નેતાઓએ કર્યુ હતુ કાયદાનું ઉલ્લંઘન
તાજેતરમાં જ જંતર-મંતરને નિયુક્ત વિરોધ સ્થળોની યાદીમાંથી દૂર કરવામાં આવ્યું હતું. મંગળવારે સવારે, સૌરવ દાસ, આશુતોષ રંકા અને કેટલાક અન્ય CJP સભ્યોને પ્રતિબંધિત આદેશોનું ઉલ્લંઘન કરીને વિસ્તારમાં પ્રવેશ્યા બાદ અટકાયતમાં લેવામાં આવ્યા હતા. સંગઠનનો દાવો છે કે તેના લગભગ 11 સભ્યોની અટકાયત કરવામાં આવી હતી.
એક પોલીસ અધિકારીએ જણાવ્યું હતું કે અટકાયતમાં લેવાયેલા વિરોધીઓને દ્વારકા જિલ્લાના જાફરપુર કલાન પોલીસ સ્ટેશન લઈ જવામાં આવ્યા હતા. CJPના કેટલાક કાર્યકરો બહાર ભેગા થયા બાદ ત્યાં અને સ્ટેશનની આસપાસ સુરક્ષા વધારી દેવામાં આવી હતી. CJPના સ્થાપક દીપકે સંગઠનના આ પગલાને જંતર-મંતર પરના પોતાના અધિકારોને ફરીથી દાવો કરવાનો પ્રયાસ ગણાવ્યો. તેમણે કહ્યું કે વિરોધ સ્થળને નિયુક્ત યાદીમાંથી દૂર કરવામાં આવ્યું હોવા છતાં તેમનો વિરોધ ચાલુ રહેશે.
એક વર્ષ સુધી શાંતિ જાળવવાની શરતે મુક્ત
શનિવારે, દીપક, સૌરવ દાસ અને આશુતોષ રંકાને દિલ્હી પહોંચ્યા બાદ અટકાયતમાં લેવામાં આવ્યા હતા. કડક સુરક્ષા પગલાંને કારણે જ્ઞાનેશ કુમારના રાજીનામાની માંગણી સાથે CJPના આયોજિત વિરોધને અટકાવી દેવામાં આવ્યો હતો. ત્રણેયને એક દિવસ પછી એ શરતે મુક્ત કરવામાં આવ્યા હતા કે તેઓ એક વર્ષ સુધી શાંતિમાં ખલેલ પહોંચાડશે નહીં.
આ પણ વાંચોઃ Saudi Arabia : ઓઇલ કંપનીની બિલ્ડિંગ પર હુતીઓનો હુમલો, પેટ્રોલ પંપો પર લાંબી લાઈનો
