દિલ્હીમાં ચાલી રહેલા CJP વિરોધ પ્રદર્શન દરમિયાન હિંસા અને અરાજકતાની અત્યંત ભયાનક ઘટનાઓ સામે આવી રહી છે. મંગળવારે સાંજે પ્રદર્શન દરમિયાન એક ઉશ્કેરાયેલા ટોળાએ RAF (રેપિડ એક્શન ફોર્સ) ના એક જવાનને ઘેરી લઈને તેના પર જીવલેણ હુમલો કરી લિંચિંગનો પ્રયાસ કર્યો હતો. રાત્રે આઠ વાગ્યાની આસપાસ બનેલી આ ઘટનાનો એક વીડિયો પણ સોશિયલ મીડિયા પર વાયરલ થયો છે, જેમાં પ્રદર્શનકારીઓ ભાગી રહેલા જવાનને લાત મારીને નીચે પછાડી રહ્યા છે અને નિર્દયતાથી મારી રહ્યા છે. સદનસીબે, સમયસર તેના સાથી જવાનો દોડી આવ્યા હતા અને તેનો જીવ બચાવવામાં સફળ રહ્યા હતા. આ ગંભીર મામલે પોલીસે FIR નોંધીને કાયદેસરની કાર્યવાહી હાથ ધરી છે.
રાજધાનીમાં વ્યાપક હિંસા અને તોડફોડ જોવા મળી
આ આંદોલન દરમિયાન રાજધાનીમાં વ્યાપક હિંસા અને તોડફોડ જોવા મળી છે. કનોટ પ્લેસ વિસ્તારમાં બપોરે દોઢ વાગ્યાની આસપાસ પ્રદર્શનકારીઓએ પોલીસના અનેક બેરિકેડ તોડી નાખ્યા હતા. આ દરમિયાન પોલીસ વાહનોની બારીઓ તોડવાની અને પોલીસ વાનની તોડફોડ કરવાની ઘટનાઓ પણ નોંધાઈ છે. આટલું જ નહીં, પ્રદર્શનકારીઓએ દિલ્હી પોલીસ મુખ્યાલયની સામે પણ હોબાળો મચાવ્યો હતો. પોલીસના જણાવ્યા અનુસાર, કેટલાક પ્રદર્શનકારીઓ તલવારો સાથે જયસિંહ રોડ અને ટૉલ્સટોય માર્ગ પર ફરતા નજરે પડ્યા હતા, જોકે સદનસીબે કોઈના પર હથિયારથી હુમલો કરવામાં આવ્યો ન હતો. સોમવારની સંસદ કૂચ બાદ મંગળવારે પણ હિંસા યથાવત રહેતા સ્થિતિ વધુ વણસી છે.
https://twitter.com/Vishii14/status/2079725769627173372