દિલ્હીમાં ચાલી રહેલા ઉગ્ર વિરોધ પ્રદર્શનો અને તાજેતરની હિંસક અથડામણોને ધ્યાનમાં રાખીને કેન્દ્ર સરકારે કાયદો અને વ્યવસ્થા જાળવવા માટે અત્યંત કડક પગલાં લીધા છે. રાષ્ટ્રીય રાજધાનીમાં સુરક્ષા વ્યવસ્થાને મજબૂત કરવા માટે દેશના વિવિધ ભાગોમાંથી અર્ધલશ્કરી દળોની 24 વધારાની કંપનીઓને એરલિફ્ટ કરીને દિલ્હી બોલાવવામાં આવી છે. સ્થિતિની ગંભીરતાને જોતાં નવી દિલ્હી વિસ્તારના 16 મેટ્રો સ્ટેશનોને અસ્થાયી રૂપે બંધ કરી દેવામાં આવ્યા છે, જ્યારે વડાપ્રધાનના નિવાસસ્થાનની આસપાસ સુરક્ષાનું અભેદ્ય કવચ ગોઠવી દેવામાં આવ્યું છે.
વિરોધ પ્રદર્શન વચ્ચે સુરક્ષા વ્યવસ્થા સઘન કરાઇ
સૂત્રોના જણાવ્યા અનુસાર, જંતર-મંતર સહિતના વિસ્તારોમાં છેલ્લા કેટલાક દિવસોથી વિરોધ પ્રદર્શનો ચાલી રહ્યા છે, જેમાં વિરોધીઓ અને સુરક્ષા દળો વચ્ચે હિંસક ઝપાઝપી, વાહનોમાં તોડફોડ અને પથ્થરમારા જેવી ઘટનાઓ સામે આવી છે. આ સ્થિતિ વધુ વણસતી અટકાવવા માટે સરકારે સ્પષ્ટ સંકેત આપ્યા છે કે હવે કાયદો હાથમાં લેનારાઓ સામે કડક કાર્યવાહી કરવામાં આવશે. ગત મંગળવારે વિપક્ષના નેતા રાહુલ ગાંધી અને અન્ય કોંગ્રેસ સાંસદોએ અચાનક 7 લોક કલ્યાણ માર્ગ સ્થિત વડાપ્રધાનના નિવાસસ્થાનની બહાર પહોંચીને ધરણા પ્રદર્શન કર્યા હતા, જેને પગલે પીએમ હાઉસની બાહ્ય સુરક્ષામાં ભારે વધારો કરીને વધારાના એસપીજી (SPG) કમાન્ડો તૈનાત કરવા પડ્યા હતા.