દિલ્હી પોલીસની સ્પેશિયલ સેલે પાકિસ્તાનની ગુપ્તચર એજન્સી ISI સાથે જોડાયેલા એક મોટા આતંકી નેટવર્ક સામે મોટી કાર્યવાહી હાથ ધરી છે. આ કાર્યવાહીમાં વધુ પાંચ શંકાસ્પદ આતંકીઓને ધરપકડ કરવામાં આવી છે. તપાસમાં ખુલાસો થયો છે કે આ નેટવર્ક દિલ્હી-એનસીઆર સહિત અનેક રાજ્યોમાં પોલીસકર્મીઓ અને સુરક્ષા સંસ્થાઓને નિશાન બનાવવા માટે સક્રિય હતું.
તમામ આરોપીઓ પાકિસ્તાનમાં બેઠેલા હેન્ડલર શહજાદ ભટ્ટીના સંપર્કમાં હતા
પોલીસે ધરપકડ કરાયેલા આરોપીઓ પાસેથી પાંચ પિસ્તોલ, જીવંત કારતૂસ, મોબાઇલ ફોન અને પાકિસ્તાન સમર્થિત પોસ્ટર તથા અન્ય વાંધાજનક સામગ્રી જપ્ત કરી છે. તપાસ એજન્સીઓ હવે તેમના ડિજિટલ ડેટા અને નાણાકીય લેવડદેવડની ઊંડાણપૂર્વક તપાસ કરી રહી છે. ધરપકડ કરાયેલા આરોપીઓની ઓળખ સોહેલ, સોનુ મીણા, સચિન કુમાર મીણા, મહંમદ કૈફ અને મહંમદ રિહાન તરીકે થઈ છે. પોલીસના જણાવ્યા મુજબ આ તમામ આરોપીઓ પાકિસ્તાનમાં બેઠેલા હેન્ડલર શહજાદ ભટ્ટીના સંપર્કમાં હતા અને તેના નિર્દેશો મુજબ કામ કરતા હતા.
દીવાલો પર નારા લખવાના આરોપો
તપાસમાં સામે આવ્યું છે કે આ ગેંગનું મુખ્ય લક્ષ્ય પોલીસ થાણા, સુરક્ષા કેમ્પ અને અન્ય સંવેદનશીલ સ્થળોની રેકી કરીને હુમલાની યોજના બનાવવાનું હતું. સાથે જ યુવાનોને પૈસા અને ઉગ્ર વિચારધારા દ્વારા ભરતી કરવાની કોશિશ પણ ચાલી રહી હતી. આરોપીઓ પર “તહરીક-એ-તાલિબાન હિન્દુસ્તાન (TTH)” નામના સંગઠનના સમર્થનમાં દીવાલો પર નારા લખવા અને પ્રચાર કરવા જેવા આરોપો પણ છે. મુખ્ય આરોપી સોહેલ સોશિયલ મીડિયા અને એન્ક્રિપ્ટેડ એપ્સ દ્વારા પાકિસ્તાનમાં બેઠેલા હેન્ડલર્સ સાથે સંપર્કમાં હતો અને તેના બદલામાં તેને નાણાં પણ મળતા હતા.
સમગ્ર નેટવર્કની ઊંડાણપૂર્વક તપાસ
પોલીસના જણાવ્યા મુજબ ગેંગના કેટલાક સભ્યોને પોલીસકર્મીઓ પર હુમલા માટે લાખો રૂપિયાની લાલચ પણ આપવામાં આવી હતી. અગાઉ પણ આ જ નેટવર્ક સાથે જોડાયેલા કેટલાક આરોપીઓની ધરપકડ થઈ ચૂકી છે. હાલ સમગ્ર નેટવર્કની ઊંડાણપૂર્વક તપાસ ચાલી રહી છે અને એજન્સીઓનું માનવું છે કે આગામી દિવસોમાં વધુ ખુલાસા અને ધરપકડો થઈ શકે છે.
આ પણ વાંચો : India News: ભારતમાં આ રાજ્યના લોકો પીવે છે સૌથી વધુ બિયર, આંકડા ચોંકાવી દેશે
