Punjab : ગેંગસ્ટર ગોલ્ડી બરારના નજીકના સાગરિતની ધરપકડ, પંજાબ પોલીસે 5 પિસ્તોલ કરી જપ્ત

પંજાબ પોલીસે લોરેન્સ બિશ્નોઈ ગેંગના કુખ્યાત ગેંગસ્ટર ગોલ્ડી બરારના નેટવર્ક પર મોટો વાર કર્યો છે. રવિવારે ગેંગસ્ટર વિરોધી ટાસ્ક ફોર્સે એક મોટા ઓપરેશનમાં તેના નજીકના સહયોગી બલજિંદર સિંહ ઉર્ફે રેન્ચની ધરપકડ કરી લીધી છે. પોલીસે તેની પાસેથી 32 બોરની 5 પિસ્તોલ અને 10 કારતૂસ જપ્ત કર્યા છે.

આરોપી ધરાવે છે ગુનાહિત ઈતિહાસ

પંજાબના DGP ગૌરવ યાદવે જાણકારી આપી કે બલજિંદર સિંહ ભટિંડાના માહી નાંગલનો રહેવાસી છે અને તે ગુનાહિત ઈતિહાસ ધરાવે છે. તેની વિરૂદ્ધ ભારતીય દંડ સંહિતા અને એનડીપીએસ એક્ટ હેઠળ કેસ નોંધાયેલા છે. રેન્ચ ગોલ્ડ બરારની ગેંગ માટે ગેરકાયદેસર હથિયારોની સપ્લાયમાં સક્રિય રીતે સામેલ હતો. ડીજીપીએ વધુમાં કહ્યું કે પ્રાથમિક તપાસમાં સ્પષ્ટ થયું કે જપ્ત કરેલા હથિયાર ગોલ્ડી બરારના ઈશારા પર ખરીદવામાં આવ્યા હતા. આ સપ્લાય ચેનને તેના મુખ્ય સહયોગી મલકીત સિંહ ઉર્ફે કિત્તા ભાની ઓપરેટ કરી રહ્યો હતો. જે હાલમાં કપૂરથલા જેલમાં બંધ છે અને ત્યાંથી જ ગેંગને નિર્દેશ આપી રહ્યો હતો. આ ગેંગનો ઉદ્દેશ્ય પંજાબમાં શાંતિને બગાડવાનો હતો.

ગોલ્ડી ગેંગ પંજાબમાં કોઈ મોટી ઘટનાને અંજામ આપવાની યોજના બનાવી રહ્યું હતું

તેમને કહ્યું કે પોલીસ હવે આ નેટવર્કની ગેંગની તપાસ કરી રહી છે, જેથી આની પાછળના ચેહરાનો પર્દાફાશ કરવામાં આવી શકે. ઓપરેશન વિશે વિસ્તારથી જાણકારી આપતા કહ્યું કે એક સ્પેશિયલ ટીમ બનાવવામાં આવી હતી. આ ટીમને ઈનપુટ મળ્યો હતો. તેમાં જાણવા મળ્યું કે ગોલ્ડી ગેંગ પંજાબમાં કોઈ મોટી ઘટનાને અંજામ આપવાની યોજના બનાવી રહ્યું છે. ત્યારબાદ તરત જ કાર્યવાહી કરવામાં આવી. શ્રી મુક્તસર સાહિબ જિલ્લાના મલૌત-મુક્તસર રોડ પર નવા બાયપાસ ફ્લાયઓવરની નીચેથી બલજિંદર ઉર્ફ રેન્ચને દબોચી લેવામાં આવ્યા છે. તેની વિરૂદ્ધ કલમ 25 અને 25 (7) (8) હેઠળ કેસ નોંધવામાં આવ્યો છે.