દેશના અસંખ્ય રાજ્યોમાં ચક્રવાતી વાવાઝોડા 'અર્નબ'ની ગંભીર અસર જોવા મળી રહી છે. આંધ્રપ્રદેશના દરિયાકાંઠે ત્રાટક્યા બાદ આ વાવાઝોડું ભલે ધીમે-ધીમે નબળું પડી રહ્યું હોય, પરંતુ તેના કારણે બિહાર, ઝારખંડ, ઉત્તર પ્રદેશ, હરિયાણા અને દિલ્હી સહિતના વિસ્તારોમાં પવન સાથે વરસાદી માહોલ સર્જાયો છે.

આગામી 48 કલાકમાં આ રાજ્યોને ઘમરોળશે 

હવામાન વિભાગ (IMD) ના જણાવ્યા અનુસાર, આગામી 48 કલાકમાં આ વાવાઝોડું ઉત્તર-ઉત્તરપશ્ચિમ દિશા તરફ આગળ વધશે. જોકે, આગામી થોડા કલાકોમાં તે નબળું પડીને ડિપ્રેશનમાં ફેરવાઈ જશે, છતાં તેની અસર હેઠળ દેશના 7 થી વધુ રાજ્યોમાં ભારેથી અતિ ભારે વરસાદની શક્યતા રહેલી છે.
https://x.com/Indiametdept/status/2115374373003735139?ref_src=twsrc%5Etfw%7Ctwcamp%5Etweetembed%7Ctwterm%5E2115374373003735139%7Ctwgr%5E%7Ctwcon%5Es1_c10&ref_url=

ઘણા રાજ્યોમાં અતિ ભારે વરસાદની ચેતવણી

હવામાન વિભાગની આગાહી મુજબ, પૂર્વી ઉત્તર પ્રદેશ, બિહાર, ઝારખંડ અને ઉત્તર છત્તીસગઢના કેટલાક વિસ્તારોમાં ભારેથી અતિ ભારે વરસાદ પડી શકે છે. આ સિવાય ઓડિશાના આંતરિક ભાગો, પૂર્વી વિદર્ભ, દરિયાકાંઠાના આંધ્રપ્રદેશ, પૂર્વી મધ્ય પ્રદેશ તેમજ ઉપ-હિમાલયી પશ્ચિમ બંગાળ અને સિક્કિમમાં પણ મુસળધાર વરસાદની સંભાવના વ્યક્ત કરવામાં આવી છે.

7 રાજ્યોમાં અપાયું ઓરેન્જ એલર્ટ 

સ્થિતિની ગંભીરતાને ધ્યાનમાં રાખીને IMD દ્વારા ઓડિશા, ઝારખંડ, મધ્ય પ્રદેશ, ઉત્તર પ્રદેશ, બિહાર, પંજાબ અને હરિયાણા માટે 'ઓરેન્જ એલર્ટ' જારી કરવામાં આવ્યું છે. જ્યારે દિલ્હી અને મહારાષ્ટ્ર જેવા વિસ્તારો માટે 'યલો એલર્ટ' જાહેર કરાયું છે.

લોકોને સાવચેત રહેવા તંત્રની અપીલ 

હવામાન નિષ્ણાતોના મતે, આ સમયગાળા દરમિયાન 40 થી 50 કિમી પ્રતિ કલાકની ઝડપે ભારે પવન ફૂંકાશે, જે વધીને 60 થી 70 કિમી પ્રતિ કલાક સુધી પહોંચી શકે છે. ગાજવીજ અને વાવાઝોડા સાથે થનારા આ વરસાદથી સામાન્ય જનજીવન અને વાહનવ્યવહાર પર અસર પડી શકે છે. તંત્ર દ્વારા લોકોને સાવચેત રહેવા અને હવામાન વિભાગની સૂચનાઓનું પાલન કરવાની સલાહ આપવામાં આવી છે.

આ પણ વાંચોઃ US: માત્ર એક મેસેજ અને લોકોના જીવ થયા અધ્ધર,લાસ વેગાસથી પેસેન્જર લઇને પરત ફરી ફ્લાઇટ, જાણો કેમ?