અમૃતસર પોલીસે રાષ્ટ્રીય સુરક્ષાને લગતી એક મોટી અને ચોંકાવનારી સફળતા હાંસલ કરી છે. પોલીસે પાકિસ્તાનની ગુપ્તચર સંસ્થા ISI દ્વારા સમર્થિત બે ખતરનાક આતંકવાદી મોડ્યુલનો પર્દાફાશ કરીને કુલ 9 આરોપીઓની ધરપકડ કરી છે. પકડાયેલા આ શખ્સોમાં ચાર સગીર અને પાંચ પુખ્ત વયના લોકોનો સમાવેશ થાય છે. સૌથી ગંભીર બાબત એ છે કે આ જૂથના સભ્યો દિલ્હીના જંતર-મંતર ખાતે ચાલી રહેલા વિરોધ પ્રદર્શનના સ્થળે પણ ગયા હતા અને ત્યાં તેમને સ્થાનિક સ્તરે લોજિસ્ટિકલ સપોર્ટ પૂરો પાડવામાં આવ્યો હતો, જેમાં પેટ્રોલ બોમ્બ બનાવવાની સામગ્રીનો પણ સમાવેશ થાય છે.

મગ્ર કાવતરા પાછળ ISI હેન્ડલર્સનો હાથ

અધિકારીઓના જણાવ્યા અનુસાર, આ સમગ્ર કાવતરા પાછળ પાકિસ્તાન સ્થિત ISI હેન્ડલર્સનો હાથ હતો. અમૃતસરના પોલીસ કમિશનર ગુરપ્રીત સિંહ ભુલ્લરે પ્રેસ કોન્ફરન્સમાં જણાવ્યું હતું કે પોલીસે બંને મોડ્યુલના આખા નેટવર્કને તોડી પાડ્યું છે. પ્રથમ મોડ્યુલના સભ્યો રેલવે ટ્રેક ઉપર ગુપ્ત કેમેરા લગાવી રહ્યા હતા અને આ કેમેરાનું લાઈવ ફીડ સરહદ પાર મોકલવાનું આયોજન હતું. આ જાસૂસી પ્રવૃત્તિ માટેનો ખર્ચ હવાલાના માધ્યમથી કરવામાં આવતો હતો, પરંતુ પોલીસે સમયસર બાતમી મેળવીને કેમેરા સાથે આરોપીઓને દબોચી લીધા હતા.

હેન્ડર્સને અપાઇ હતી ખાસ તાલીમ

બીજા મોડ્યુલને ISI હેન્ડલર્સ દ્વારા પેટ્રોલ બોમ્બ બનાવવા અને તેને ફેંકવાની ખાસ તાલીમ આપવામાં આવી હતી. તેમને સુરક્ષા દળો અને પોલીસ પર હુમલો કરવા માટે રેકી કરવાની સૂચના અપાઈ હતી. આશ્ચર્યજનક વાત એ છે કે આ મોડ્યુલના 8 સભ્યો જંતર-મંતર પર થયેલા વિરોધ પ્રદર્શનમાં પણ સામેલ થયા હતા, જ્યાં તેમને વિસ્ફોટક સામગ્રી અને અન્ય મદદ મળી હતી. જોકે, સુરક્ષા એજન્સીઓની સતર્કતાના કારણે તેઓ પોતાની ઘાતક યોજનાને અંજામ આપવામાં નિષ્ફળ રહ્યા હતા.

પાકિસ્તાની પ્લાનનો પર્દાફાશ થયો

આ ધરપકડથી દેશભરમાં સુરક્ષા એજન્સીઓ વધુ એલર્ટ થઈ ગઈ છે અને સગીરોનો આ પ્રકારે આતંકવાદી પ્રવૃત્તિઓમાં ઉપયોગ કરવાના પાકિસ્તાની પ્લાનનો પર્દાફાશ થયો છે. પોલીસે તમામ આરોપીઓની કડક પૂછપરછ શરૂ કરી છે અને આ નેટવર્ક સાથે જોડાયેલા અન્ય સ્થાનિક કે વિદેશી સહાયકોની પણ શોધખોળ ચાલી રહી છે. આગામી દિવસોમાં આ મામલે વધુ ચોંકાવનારા ખુલાસા થવાની પૂરી સંભાવના છે.

આ પણ વાંચોઃ  Strait of Hormuz: ઇરાનનો ઇનકાર અને ટ્રમ્પની એક બાદ એક ધમકીની ભરમાર, શું હોર્મુઝ પર સંકટ?