દિલ્હી-એનસીઆરમાં બુધવારે સાંજે હવામાનમાં અચાનક મોટો ફેરફાર જોવા મળ્યો. સવારે તીવ્ર ગરમી અને ભારે ઉકળાટથી લોકો પરેશાન હતા, પરંતુ સાંજ પડતા જ વાતાવરણ બદલાઈ ગયું. આકાશમાં વાદળો છવાઈ ગયા અને અનેક વિસ્તારોમાં ઠંડી પવનો ફૂંકાવા લાગી. દિલ્હીના કેટલાક વિસ્તારોમાં હળવો વરસાદ અને ઝરમર ઝાપટાં પણ નોંધાયા, જેના કારણે લોકોને કડકડતી ગરમીમાંથી રાહત મળી.
હવામાન વિભાગે અગાઉથી જ તેજ પવન અને વરસાદની આગાહી કરી હતી, જોકે છેલ્લા બે દિવસમાં આગાહી સંપૂર્ણ રીતે સાચી સાબિત થઈ નહોતી. મંગળવારે અનેક વિસ્તારોમાં વરસાદ નોંધાયો નહોતો, પરંતુ મોડીરાત્રે NCRના કેટલાક ભાગોમાં હળવી છાંટા જોવા મળ્યા હતા. બુધવારે દિવસ દરમિયાન દિલ્હીમાં મહત્તમ તાપમાન લગભગ 39 ડિગ્રી સેલ્સિયસ સુધી પહોંચ્યું હતું, જ્યારે હીટ ઈન્ડેક્સ 40 ડિગ્રીને પાર ગયો હતો. હવામાં ભેજનું પ્રમાણ પણ વધુ હોવાથી લોકોને ગરમી વધુ અનુભવાઈ રહી હતી. પરંતુ સાંજ પડતા જ તેજ પવન અને વરસાદને કારણે વાતાવરણમાં ઠંડક પ્રસરી ગઈ.
હવામાન વિભાગના જણાવ્યા અનુસાર અનેક વિસ્તારોમાં 30થી 40 કિલોમીટર પ્રતિ કલાકની ઝડપે પવન ફૂંકાયો. કેટલીક જગ્યાએ હળવા વરસાદી છાંટા પણ જોવા મળ્યા. IMDએ લોકોને ગરમીથી બચવા માટે પૂરતું પાણી પીવાનું અને લાંબા સમય સુધી સીધી ધૂપમાં ન રહેવાની સલાહ આપી છે. હવામાન વિભાગે જણાવ્યું છે કે આગામી એક-બે દિવસ સુધી દિલ્હી-એનસીઆરમાં વાદળછાયું વાતાવરણ અને પવનનું જોર યથાવત રહી શકે છે. જો હવામાનમાં વધુ મોટો ફેરફાર થશે તો નવી ચેતવણી અને અપડેટ જાહેર કરવામાં આવશે.
આ પણ વાંચો : NEET પેપર લીક કેસમાં 5 લોકોની ધરપકડ, 4 ડઝનથી વધુ શંકાસ્પદોની અટકાયત કરાઈ