દક્ષિણ ભારતીય સિનેમાના મશહૂર સુપરસ્ટાર અને રાજકારણી બની ચૂકેલા થલાપતિ વિજય તથા લોકપ્રિય અભિનેત્રી તૃષા કૃષ્ણનની જોડી હંમેશાં દર્શકો માટે આકર્ષણનું કેન્દ્ર રહી છે. આ બંને દિગ્ગજ કલાકારોએ સાથે મળીને સિનેમા જગતને અનેક સુપરહિટ ફિલ્મો આપી છે. તેમની પહેલી ફિલ્મ આજથી બાવીસ વર્ષ પહેલાં રિલીઝ થઈ હતી, જેણે બોક્સ ઓફિસ પર બ્લોકબસ્ટર સફળતા મેળવી હતી. ત્યારથી લઈને આજદિન સુધી આ ઓનસ્ક્રીન જોડીએ ફેન્સના દિલમાં એક ખાસ સ્થાન જાળવી રાખ્યું છે.
અંગત જીવનમાં પણ બંને છે ગાઢ મિત્ર
માત્ર ફિલ્મી પડદે જ નહીં, પરંતુ વાસ્તવિક જીવનમાં પણ થલાપતિ વિજય અને તૃષા કૃષ્ણન ખૂબ જ ગાઢ મિત્રો છે. તેઓ હંમેશાં એકબીજાના સુખ-દુઃખમાં પડછાયાની જેમ સાથ આપતા જોવા મળે છે. તૃષાએ વિજયના ખાસ પ્રસંગોમાં પણ ઉત્સાહપૂર્વક હાજરી આપી છે. ચાલો નજર કરીએ તેમની સાથે કામ કરેલી કેટલીક યાદગાર ફિલ્મો પર:
જોડીએ 2004માં આવેલી ફિલ્મમાં મચાવી હતી ધૂમ
'ગિલ્લી' (2004): આ જોડીએ સૌપ્રથમવાર 2004માં આવેલી ફિલ્મ 'ગિલ્લી'માં સાથે કામ કર્યું હતું. આ ફિલ્મ તમિલ સિનેમાની સૌથી પ્રિય અને બ્લોકબસ્ટર ફિલ્મોમાં સ્થાન પામી. તેમની રોમાન્ટિક અને એનર્જેટિક કેમેસ્ટ્રીએ દર્શકોને મંત્રમુગ્ધ કરી દીધા હતા, અને તાજેતરમાં 2024માં આ ફિલ્મે પોતાના શાનદાર 20 વર્ષ પૂરા કર્યા ત્યારે તેને થિયેટરોમાં ફરીથી રિલીઝ કરવામાં આવી હતી.
વિજય અને તૃષાની જોડી રહી હીટ
'થિરુપાચી' અને 'આથી': 'ગિલ્લી' ની અપાર સફળતા બાદ આ બંનેએ 'થિરુપાચી' માં શાનદાર અભિનય કર્યો. ત્યારબાદ તેઓ "આથી" માં ફરી એકસાથે પડદા પર આવ્યા. ભલે આ ફિલ્મ બોક્સ ઓફિસ પર ધાર્યું પરિણામ ન લાવી શકી, પરંતુ વિજય અને તૃષાની જોડીને દર્શકો દ્વારા ભરપૂર પ્રેમ મળ્યો હતો.
આ ફિલ્મે તો કમાણીના તમામ રેકોર્ડ તોડ્યા
'કુરુવી' અને 'લિયો': થોડા જ વર્ષોમાં ચાર ફિલ્મો આપ્યા બાદ આ જોડીએ લાંબો વિરામ લીધો. પરંતુ, પૂરા 14 વર્ષના લાંબા અંતરાલ પછી, લોકેશ કનકરાજની બ્લોકબસ્ટર ફિલ્મ "લિયો" માં તેઓ ફરીથી સાથે પરત ફર્યા. આ ફિલ્મમાં તેમની પરિપક્વ અભિનય શૈલીએ ડાર્ક અને હાઇ-વોલ્ટેજ વાર્તામાં ચાર ચાંદ લગાવી દીધા અને ફિલ્મે કમાણીના તમામ રેકોર્ડ તોડી નાખ્યા.
આ પણ વાંચોઃ Video : વિદિશામાં ભણતર માટે જીવના જોખમે બાળકો પાર કરી રહ્યા છે નદી, તંત્રના ધ્યાને આવતા રસ્તો કરાયો બંધ
