સોશિયલ મીડિયા પર હાલમાં એક ક્યૂટ અને હસતી નાની બાળકીનો વીડિયો ખૂબ જ ઝડપથી વાયરલ થઈ રહ્યો છે, જેમાં બેકગ્રાઉન્ડમાં લાગણીશીલ સોન્ગ પણ વાગી રહ્યુ છે આ વીડિયોને શેર કરીને મોટાભાગના યુઝર્સ એવો દાવો કરી રહ્યા છે કે આ માસૂમ બાળકીને તેના સ્વાર્થી માતાપિતાએ તરછોડી દીધી છે. કેટલાક સોશિયલ મીડિયા હેન્ડલ્સ પર તો એવો પણ દાવો કરવામાં આવ્યો છે કે આ ઘટના મહારાષ્ટ્રના નાસિકની છે, જ્યાં એક દંપતીએ માત્ર પુત્રી હોવાના કારણે અને પુત્રની ઇચ્છામા જ આ નાની બાળકીને ત્યજી દીધી હતી. પરંતુ આ વાયરલ વીડિયોની હકીકત તો કંઇક અલગ જ નીકળી.
વાયરલ વીડિયોનું ફેક્ટ ચેક
આ વાયરલ વીડિયોની સત્યતા ચકાસવા માટે જ્યારે તેના કીફ્રેમ્સને ઇન્ટરનેટ પર રિવર્સ-સર્ચ કરવામાં આવ્યા, ત્યારે આખો મામલો સ્પષ્ટ થઈ ગયો. આ વીડિયો વાસ્તવમાં યશિકા પાટીદાર નામના એક ઇન્સ્ટાગ્રામ એકાઉન્ટ પરથી 4 જુલાઈના રોજ અપલોડ કરવામાં આવ્યો હતો. આ પોસ્ટના અસલ કેપ્શનમાં સ્પષ્ટ શબ્દોમાં લખવામાં આવ્યું છે કે આ દ્રશ્ય કોઈ વાસ્તવિક ઘટના સાથે જોડાયેલું નથી, પરંતુ તે "નવું વર્ષ" નામની એક શોર્ટ ફિલ્મના શૂટિંગ દરમિયાન ફિલ્માવવામાં આવ્યું છે.