India: ફેન્ટસી ગેમિંગ પર હવે પ્રતિબંધ, ઓનલાઈન ગેમિંગ બિલને રાષ્ટ્રપતિની મંજૂરી મળી

સંસદના તાજેતરના ચોમાસુ સત્ર દરમિયાન ઓનલાઈન ગેમિંગ બિલ પસાર કરવામાં આવ્યું હતું. સંસદના બંને ગૃહો લોકસભા અને રાજ્યસભા દ્વારા પસાર કરાયેલ ઓનલાઈન ગેમિંગ પ્રમોશન અને નિયમન બિલને હવે રાષ્ટ્રપતિની મંજૂરી મળી ગઈ છે. આ સાથે ફેન્ટસી ગેમિંગ એપ્સ પર પ્રતિબંધ મૂકવાનો માર્ગ મોકળો થઈ ગયો છે.

ઓનલાઈન ગેમિંગ બિલ પસાર

રાષ્ટ્રપતિની મંજૂરી સાથે તે હવે કાયદો બની ગયો છે અને તેની જોગવાઈઓ અમલમાં આવી ગઈ છે. આ કાયદાના અમલીકરણ પછી ફેન્ટસી લીગ, કાર્ડ ગેમ્સ, ઓનલાઈન લોટરી, પોકર, રમી અને સટ્ટાબાજી પર સંપૂર્ણપણે પ્રતિબંધ મૂકવામાં આવ્યો છે. નોંધનીય છે કે ઓનલાઈન ગેમિંગના પ્રમોશન અને નિયમન બિલને 20 ઓગસ્ટે લોકસભા અને 21 ઓગસ્ટે રાજ્યસભા દ્વારા પસાર કરવામાં આવ્યું હતું. આ બિલ બંને ગૃહોમાં આઈટી મંત્રી અશ્વિની વૈષ્ણવે રજૂ કર્યું હતું. આ કાયદાના અમલથી દેશના ઓનલાઈન ગેમિંગ ઉદ્યોગને મોટો ફટકો પડ્યો છે. ડ્રીમ 11 અને માય ઈલેવન સર્કલ જેવી ફેન્ટસી ગેમિંગ એપ્સે તેમના પ્લેટફોર્મ પર વાસ્તવિક પૈસાથી થતી રમતો પર પ્રતિબંધ મૂક્યો છે. દેશમાં ઓનલાઈન ગેમિંગ ઉદ્યોગ કુલ $3.8 બિલિયનનો હોવાનો અંદાજ છે. નવા કાયદાને કારણે આ ઉદ્યોગનું ભવિષ્ય જોખમમાં છે.

નવા કાયદાને કારણે આ ઉદ્યોગનું ભવિષ્ય જોખમમાં

નોંધનીય છે કે સંસદમાં આ બિલ રજૂ કરતી વખતે, આઇટી મંત્રી અશ્વિની વૈષ્ણવે કહ્યું હતું કે ઓનલાઈન ગેમિંગના ત્રણ વિભાગો છે. તેમણે કહ્યું હતું કે સરકાર બે વિભાગોને પ્રોત્સાહન આપશે, રિયલ મની ગેમિંગ પર પ્રતિબંધ મૂકવામાં આવશે. આઇટી મંત્રીએ રિયલ મની ગેમિંગને સમાજ માટે એક મોટો પડકાર ગણાવ્યો હતો. તેમણે કહ્યું હતું કે જ્યારે સરકારે સમાજ અને મહેસૂલ વચ્ચે પસંદગી કરવાની હોય છે, ત્યારે સરકારે હંમેશા સમાજને પ્રાથમિકતા આપી છે અને આ બિલમાં પણ અમે સમાજને પસંદ કર્યો છે. અશ્વિની વૈષ્ણવે કર્ણાટકમાં આત્મહત્યાના આંકડાઓ સંબંધિત મીડિયા અહેવાલોને પણ ટાંકીને કહ્યું હતું.