કેન્દ્રીય પંચાયતી રાજ, મત્સ્યઉદ્યોગ, પશુપાલન અને ડેરી ઉદ્યોગ મંત્રી રાજીવ રંજન સિંહ (જેઓ 'લલ્લન સિંહ' તરીકે પણ ઓળખાય છે) દ્વારા એક મહત્વપૂર્ણ અને મોટી જાહેરાત કરવામાં આવી છે. તેમણે જણાવ્યું છે કે વિવિધ સરકારી યોજનાઓના લાભાર્થીઓને નાણાકીય ચૂકવણી (Payment) કરવા માટે હવે આધાર કાર્ડને બદલે વ્યક્તિની બાયોમેટ્રિક માહિતી અને તેના મતદાર ઓળખપત્ર એટલે કે વોટર ID (EPIC) નંબરનો આધાર તરીકે ઉપયોગ કરવામાં આવશે.
'આધાર કાર્ડ હવે ઓળખનો મુખ્ય આધાર નહીં રહે'
પંચાયતી રાજ મંત્રાલય દ્વારા આયોજિત 'રાષ્ટ્રીય જન યોજના અભિયાન 2026-27' પરના એક રાષ્ટ્રીય વર્કશોપને સંબોધતા કેન્દ્રીય મંત્રી સિંહે જણાવ્યું હતું કે, હાલમાં દરેક શેરી અને ગલીઓમાં આધાર પ્રોસેસિંગ સેન્ટરો ઉપલબ્ધ થઈ ગયા છે, જ્યાંથી આસાનીથી બોગસ કે નકલી આધાર કાર્ડ બનાવી લેવાના કિસ્સાઓ સામે આવે છે. આ પરિસ્થિતિને અટકાવવા માટે જલ્દી જ ચૂકવણીની સિસ્ટમમાં ફેરફાર કરાશે. હવેથી લાભાર્થીઓની સાચી ઓળખ માટે તેમના બાયોમેટ્રિક્સ અને વોટર ID (EPIC) નંબરને જ ચૂકવણીનો મુખ્ય આધાર બનાવવામાં આવશે. જોકે, તેમણે હજુ સુધી સ્પષ્ટ કર્યું નથી કે કઈ-કઈ ચોક્કસ યોજનાઓમાં સૌપ્રથમ EPIC નંબરનો ઉપયોગ શરૂ કરાશે.