કેન્દ્ર સરકાર દેશમાં વધતા જતા પેપર લીક અને પરીક્ષાની ગેરરીતિઓને ડામવા માટે પ્રસ્તાવિત 'પરીક્ષા સુધારા બિલ' દ્વારા કાયદાને વધુ કડક બનાવવાની તૈયારી કરી રહી છે. વડાપ્રધાન નરેન્દ્ર મોદી દ્વારા આ મુદ્દે કડક કાર્યવાહીના સંકેતો આપ્યા બાદ, જાહેર પરીક્ષાઓ (અન્યાયી માધ્યમો નિવારણ) અધિનિયમ, 2024માં મહત્વના સુધારા કરવામાં આવી રહ્યા છે.
દંડ વધુ કડક કરાશે
મળતી માહિતી અનુસાર, કેબિનેટની બેઠકમાં આ પ્રસ્તાવિત સુધારાઓને મંજૂરી મળવાની પૂરી સંભાવના છે અને સંસદના ચોમાસા સત્રના બીજા અઠવાડિયામાં આ નવું બિલ રજૂ કરવામાં આવી શકે છે. નવા સુધારાઓ અંતર્ગત પેપર લીક અને છેતરપિંડીના દોષિતો સામે અત્યંત સખત દંડ અને સજાની જોગવાઈઓ સામેલ કરવામાં આવી છે. હાલના નિયમો મુજબ વ્યક્તિગત કેસોમાં ત્રણથી પાંચ વર્ષની જેલ અને દસ લાખ રૂપિયા સુધીના દંડની જોગવાઈ છે, જેને વધારીને હવે 5 થી 10 વર્ષ સુધીની જેલ અને લઘુત્તમ દંડ ₹1 કરોડ સુધીનો કરવામાં આવી શકે છે. આ કાયદાકીય સુધારાનો મુખ્ય ઉદ્દેશ્ય પરીક્ષા પ્રણાલીમાં પારદર્શિતા લાવવાનો અને વિદ્યાર્થીઓનું ભવિષ્ય બગાડતા ગુનેગારોમાં કાયદાનો ડર ઊભો કરવાનો છે.
ફાસ્ટ ટ્રેક કોર્ટની સ્થાપના કરાશે
આ ઉપરાંત, કેસની સુનાવણી ઝડપથી પૂર્ણ થાય તે માટે ફાસ્ટ-ટ્રેક કોર્ટોની સ્થાપના કરવામાં આવી છે અને તેમને વધુ સત્તાઓ પણ સોંપવામાં આવી શકે છે, જેથી ન્યાય પ્રક્રિયા ઝડપી બની શકે. સરકારના આ પગલાં સામે વિપક્ષ દ્વારા સવાલો ઉઠાવવામાં આવ્યા છે કે અગાઉથી જ 2024નો કાયદો અસ્તિત્વમાં હોવા છતાં તેનો અમલ કેવી રીતે થશે અને શિક્ષણ મંત્રીના રાજીનામાની માંગ પર તેઓ અડગ છે. સરકારે જવાબ આપ્યો છે કે NEET પેપર લીક કેસમાં અગાઉના કાયદા હેઠળ જ 13 આરોપીઓ પર આરોપ મૂકવામાં આવ્યા છે અને ફાસ્ટ-ટ્રેક કોર્ટ દ્વારા કાર્યવાહી ચાલી રહી છે.
સંસદમાં બિલ પસાર કરાવવાના પ્રયાસો હાથ ધરાશે
વડાપ્રધાનના નેતૃત્વમાં સરકાર દ્વારા લેવાઈ રહેલા આ નિર્ણયોથી સ્પષ્ટ થાય છે કે શિક્ષણ ક્ષેત્રમાં ભ્રષ્ટાચાર અને છેતરપિંડી પ્રત્યે શૂન્ય સહનશીલતાની નીતિ અપનાવવામાં આવી રહી છે. સંસદના બંને ગૃહોમાં આ બિલને પસાર કરાવવાના પ્રયાસો હાથ ધરાશે, જેથી ભવિષ્યમાં કોઈ પણ વ્યક્તિ કે સંસ્થા વિદ્યાર્થીઓના ભવિષ્ય સાથે ચેડાં કરવાની હિંમત ન કરી શકે.
આ પણ વાંચોઃ Donald Trump ની મોટી જાહેરાત,યુદ્ધમાં થયેલા જહાજોના નુકસાનની ભરપાઈ ઈરાનના ફ્રીઝ ભંડોળમાંથી કરાશે
