13 નવેમ્બર, શુક્રવારે દેશભરમાં અનેક મહત્ત્વપૂર્ણ કાર્યક્રમો યોજાવાના છે. પીએમ મોદી કર્ણાટકના પ્રવાસે જશે અને સાંજે ગુજરાત પહોંચશે. બીજી તરફ દેશભરમાં ચાર દિવસીય છઠ મહાપર્વનો પ્રારંભ થશે. નવી દિલ્હીમાં આંતરરાષ્ટ્રીય વેપાર મેળાનું ઉદ્ઘાટન થશે, જ્યારે હૈદરાબાદમાં ભારત સમિટ યોજાશે.
પીએમ મોદી 13 નવેમ્બરે કર્ણાટકના પ્રવાસે જશે. સવારે 10:45 વાગ્યે બેંગલુરુમાં પ્રશાંતિ કુટિરમના સુવર્ણ જયંતી સમારોહમાં હાજરી આપશે અને જનસભાને સંબોધિત કરશે.
બપોરે 12:45 વાગ્યે તવરેક્કેરેથી આઈઆઈએમ બેંગલુરુ મેટ્રો સ્ટેશન સુધી મેટ્રોને લીલી ઝંડી બતાવશે અને મેટ્રોમાં મુસાફરી કરશે.
બપોરે 1:15 વાગ્યે બેંગલુરુમાં વંદે ભારત ટ્રેનને લીલી ઝંડી બતાવશે. આ ઉપરાંત રૂ. 15,600 કરોડથી વધુની વિવિધ વિકાસ યોજનાઓનું શિલાન્યાસ, ઉદ્ઘાટન અને લોકાર્પણ કરશે.
બપોરે 3:30 વાગ્યે મૈસુરમાં ભારત વનમાં વૃક્ષારોપણ કાર્યક્રમમાં ભાગ લેશે. સાંજે 4 વાગ્યે કોસ્મોસ-મૈસુરુ તારામંડળનું ઉદ્ઘાટન કરશે. ત્યારબાદ સાંજે પીએમ મોદી ગુજરાત પહોંચશે. રાત્રે તેઓ ગાંધીનગર લોકભવનમાં રાત્રિ રોકાણ કરશે
13 નવેમ્બરથી દેશભરમાં ચાર દિવસીય છઠ મહાપર્વનો પ્રારંભ થશે. નહાય-ખાય સાથે પર્વની શરૂઆત થશે અને 16 નવેમ્બરે સમાપન થશે. અમદાવાદમાં વસતા ઉત્તર ભારતીયો પોતાના વતન જઈ શકતા ન હોવાથી તેમના માટે સાબરમતી નદીના કિનારે ખાસ વ્યવસ્થા કરવામાં આવી છે. છઠ પૂજા માટે ઘાટ પણ તૈયાર કરવામાં આવ્યો છે.
ભારત આંતરરાષ્ટ્રીય વેપાર મેળો એટલે કે આઈઆઈટીએફ 2026નું આયોજન 14થી 27 નવેમ્બર દરમિયાન નવી દિલ્હીના ભારત મંડપમ ખાતે થશે. 13 નવેમ્બરે કેન્દ્રીય વાણિજ્ય અને ઉદ્યોગમંત્રી પીયૂષ ગોયલ મેળાનું ઉદ્ઘાટન કરશે. કાર્યક્રમમાં પદ્મશ્રી સન્માનિત ગુરુ માધવી મુદગલ અને તેમનું જૂથ ઓડિસી નૃત્ય રજૂ કરશે.
હવામાનની દૃષ્ટિએ બંગાળની ખાડીમાં 13 નવેમ્બરે લો પ્રેશર સર્જાવાની શક્યતા છે. આ સિસ્ટમ આગળ જતાં સ્પષ્ટ લો પ્રેશરના ક્ષેત્રમાં પરિવર્તિત થઈ શકે છે. આગામી 24 કલાક દરમિયાન તે ઉત્તર-પશ્ચિમ દિશામાં આગળ વધે તેવી સંભાવના છે.
13 અને 14 નવેમ્બરે હૈદરાબાદમાં ભારત સમિટ યોજાશે. તેમાં 6 અલગ વિષયો પર પેનલ બનાવવામાં આવી છે. કાર્યક્રમમાં 11 વૈશ્વિક નેતાઓ ભાગ લેશે. લોકસભામાં વિપક્ષના નેતા રાહુલ ગાંધી સહિત 10 મોટા નેતાઓને પણ આમંત્રણ આપવામાં આવ્યું છે. સમિટમાં લગભગ 100 દેશોના પ્રતિનિધિઓ ભાગ લેશે.
રક્ષામંત્રી અને લખનૌના સાંસદ રાજનાથ સિંહ 13 નવેમ્બરે લખનૌની મુલાકાત લેશે. તેઓ સુલતાનપુર રોડ પર આવેલા ગુલઝાર ઉપવનમાં નવનિર્મિત સંસ્કૃતિ ભવનનું ઉદ્ઘાટન કરશે. કાર્યક્રમ સવારે 11:30થી બપોરે 1 વાગ્યા સુધી યોજાશે.
ઉપરાષ્ટ્રપતિ સી.પી. રાધાકૃષ્ણન 13 નવેમ્બરે આંધ્રપ્રદેશના વિશાખાપટ્ટનમ જશે. તેઓ ભારતીય ઉદ્યોગ સંઘની 31મી પાર્ટનરશિપ સમિટના સમાપન સત્રને સંબોધિત કરશે.
આ પણ વાંચો : Crime : રસગુલ્લો હોવાનું કહીને મોંઢામાં મુકી દીધો બોમ્બ, વિસ્ફોટમાં 35 વર્ષીય યુવકનું મોત, પોલીસ તપાસમાં લાગી