17 મે, 2022ના રોજ ગુજરાતના દહેજ ખાતે આવેલી 'ભારત રસાયણ'ના જંતુનાશક પ્લાન્ટમાં એક ભયાનક વિસ્ફોટ અને આગની દુર્ઘટના ઘટી હતી. આ કરૂણ અકસ્માતમાં 8 લોકોના મોત થયા હતા અને અનેક લોકો ગંભીર રીતે ઘાયલ થયા હતા. નેશનલ ગ્રીન ટ્રિબ્યુનલ (NGT) દ્વારા આ દુર્ઘટનાના મૃતકોના પરિવારજનો અને ઈજાગ્રસ્તોને વધારાનું વળતર ચૂકવવાનો સ્પષ્ટ આદેશ આપવામાં આવ્યો હતો.
કંપની દ્વારા વળતર વિલંબિત કરવાના બહાના
રાષ્ટ્રીય હરિયાણા ટ્રિબ્યુનલના આદેશ બાદ, કેટલાક લાભાર્થીઓ સીધા મળી ન આવવાના કારણો ધરીને કંપની દ્વારા વળતરની રકમ અટકાવી રાખવામાં આવી હતી. લાભાર્થીઓની ભાળ ન મળવાનું કારણ આપીને કંપનીએ આશરે રૂ. 3.27 કરોડ જેટલી માતબર રકમ સુપ્રીમ કોર્ટની રજિસ્ટ્રીમાં જમા કરાવી દીધી હતી, જેના કારણે પીડિત પરિવારો ન્યાયથી વંચિત રહ્યા હતા.
સુપ્રીમ કોર્ટની લાલ આંખ અને મહત્વપૂર્ણ નિર્દેશ
જસ્ટિસ સૂર્યકાંત, જસ્ટિસ જોયમાલ્યા બાગચી અને જસ્ટિસ વી. મોહનાની બનેલી સુપ્રીમ કોર્ટની બેન્ચે ખૂબ જ કડક વલણ અપનાવ્યું હતું. કોર્ટે સ્પષ્ટ શબ્દોમાં જણાવ્યું હતું કે, લાભાર્થીઓ મળી આવતા નથી તેવું નબળું બહાનું વળતરની વહેંચણીમાં અનિશ્ચિત સમય માટે વિલંબ કરવાનું કારણ ક્યારેય બની શકે નહીં. પીડિતોને તેમનો હક સમયસર મળવો જ જોઈએ.
ગુજરાત હાઈકોર્ટને સુઓ મોટો કાર્યવાહી કરવા આદેશ
મહત્વપૂર્ણ ન્યાયિક પગલું ભરતા, સુપ્રીમ કોર્ટે ગુજરાત હાઈકોર્ટના મુખ્ય ન્યાયાધીશને આ મામલે તાત્કાલિક સુઓ મોટો કાર્યવાહી નોંધવા વિનંતી કરી છે. હાઈકોર્ટ દ્વારા બાકી રહેલા તમામ લાભાર્થીઓની ઓળખ કરવી, તેમની પાત્રતાની સચોટ ચકાસણી કરવી અને વ્યાજ સહિતની કુલ મળવાપાત્ર વળતરની રકમ સત્વરે ચૂકવાય તે સુનિશ્ચિત કરવા માટે આદેશ જાહેર કરાયા છે. જરૂર જણાય તો હાઈકોર્ટ નોટિસ પાઠવીને સંબંધિત રેકોર્ડ્સ પણ મંગાવી શકે છે.
આ પણ વાંચો: Dahej GIDCમાં વહેલી સવારે ભયંકર આગ: ધુમાડાના ગોટેગોટા છવાયા
