જમ્મુ અને કાશ્મીરના કિશ્તવાડ અને ડોડા જિલ્લામાં સતત વરસી રહેલા ભારે વરસાદે જનજીવનને વેરવિખેર કરી દીધું છે. મેદાની વિસ્તારોમાં પૂર જેવી સ્થિતિ સર્જાઈ છે, તો પહાડી વિસ્તારોમાં ભૂસ્ખલન થવાને કારણે ભારે તબાહીના દ્રશ્યો સામે આવ્યા છે. ખાસ કરીને કિશ્તવાડમાં ૫૪૦ મેગાવોટના ક્વાર હાઇડ્રોઇલેક્ટ્રિક પ્રોજેક્ટ નજીક થયેલા વિશાળ ભૂસ્ખલને લોકોની ચિંતામાં વધારો કર્યો છે. પહાડનો એક મોટો હિસ્સો તૂટી પડવાને કારણે ત્યાં ઉભેલા અનેક વાહનો કાટમાળમાં દટાઈ ગયા છે. સદનસીબે અત્યાર સુધી કોઈ જાનહાનિના અહેવાલ નથી, પરંતુ વાહનોને ભારે નુકસાન પહોંચ્યું છે.
બચાવ કામગીરી અને માર્ગોની સ્થિતિ
વહીવટીતંત્ર દ્વારા તાત્કાલિક અસરથી બચાવ ટીમો અને ભારે મશીનરી ઘટનાસ્થળે તૈનાત કરવામાં આવી છે. કાટમાળ દૂર કરીને દટાયેલા વાહનોને બહાર કાઢવા અને માર્ગોને પુનઃસ્થાપિત કરવા માટે યુદ્ધના ધોરણે કામગીરી ચાલી રહી છે. ડોડા-કિશ્તવાર મુખ્ય માર્ગ પર પ્રેમ નગર વિસ્તારમાં થયેલા ભૂસ્ખલનને કારણે વાહનવ્યવહાર સંપૂર્ણપણે ઠપ્પ થઈ ગયો છે. માર્ગ પર મોટા પથ્થરો અને માટીના ઢગલા જમા થઈ જવાથી મુસાફરી કરવી જોખમી બની છે.
વહીવટી તંત્રએ લોકોને સતર્ક રહેવાની આપી સૂચના
સ્થાનિક વહીવટીતંત્રે કટોકટીની સ્થિતિને ધ્યાનમાં રાખીને લોકોને સતર્ક રહેવાની સૂચના આપી છે. હવામાન વિભાગના પૂર્વાનુમાન મુજબ હજુ પણ વરસાદનું જોખમ હોવાથી, જ્યાં સુધી પરિસ્થિતિ સામાન્ય ન થાય ત્યાં સુધી બિનજરૂરી મુસાફરી ટાળવા ખાસ અપીલ કરવામાં આવી છે. પહાડી વિસ્તારોમાં ભૂસ્ખલનનું જોખમ વધારે હોવાથી સ્થાનિકો અને પ્રવાસીઓને નદી-નાળાની નજીક ન જવા અને સુરક્ષિત સ્થળે રહેવા જણાવાયું છે. સંબંધિત વિભાગો સતત પરિસ્થિતિ પર નજર રાખી રહ્યા છે.
https://twitter.com/KishorJoshi02/status/2074025056007757984
જનજીવન પર અસર
ભારે વરસાદને પગલે ડોડા અને કિશ્તવાડના અનેક વિસ્તારોમાં સામાન્ય જનજીવન ખોરવાઈ ગયું છે. વીજળી અને અન્ય પાયાની સેવાઓ પણ પ્રભાવિત થઈ હોવાની શક્યતા છે. વહીવટીતંત્રની પ્રાથમિકતા અત્યારે માર્ગો ખોલવાની અને લોકોને સુરક્ષિત સ્થાનો પર ખસેડવાની છે. પ્રકૃતિના આ રૌદ્ર સ્વરૂપ સામે સ્થાનિક લોકો તંત્રના સહયોગથી સાવચેતીપૂર્વક પરિસ્થિતિનો સામનો કરી રહ્યા છે. લોકોએ મુસાફરી કરતા પહેલા લેટેસ્ટ હવામાન અપડેટ્સ મેળવવાની સલાહ આપવામાં આવી છે.
આ પણ વાંચોઃ Pakistan એ માંગી ભારતની મદદ, પાકમાં ચાલી રહેલા વિરોધ વચ્ચે PoK ના એક નેતાની અપીલ
