પાકિસ્તાન કબજા હેઠળના કાશ્મીર (PoK) માં અત્યારે સ્થિતિ અત્યંત ગંભીર બની છે. પાકિસ્તાની સેનાના કથિત અત્યાચારો અને વહીવટીતંત્રની દમનકારી નીતિઓ સામે સ્થાનિક લોકોમાં ભારે રોષ ફેલાયો છે. આ અશાંતિ વચ્ચે, જોઈન્ટ આવામી એક્શન કમિટી (JAAC) ના નેતા સરદાર અમાન ખાને ભારત સરકારને મદદ માટે અપીલ કરીને સમગ્ર ક્ષેત્રમાં રાજકીય ગરમાવો લાવી દીધો છે.

સ્થાનિક લોકોની વિકટ પરિસ્થિતિ

છેલ્લા એક મહિનાથી PoKમાં ચાલી રહેલા વિરોધ પ્રદર્શનો હવે એક મોટા જનઆંદોલનમાં ફેરવાઈ ગયા છે. સરદાર અમાન ખાને રાવલકોટના ઈદગાહ મેદાનમાં આયોજિત એક વિશાળ રેલીને સંબોધતા સ્પષ્ટપણે કહ્યું કે, "અમને ભારતની મદદની જરૂર છે." તેમનો આરોપ છે કે પાકિસ્તાની સુરક્ષા દળોએ વિરોધને દબાવવા માટે આ પ્રદેશમાં આર્થિક નાકાબંધી લાદી દીધી છે, જેના કારણે પ્રજા રાશન, દવાઓ અને જીવનજરૂરી ચીજવસ્તુઓની અછતનો સામનો કરી રહી છે.

નિયંત્રણ રેખા (LoC) ખોલવાની કરી માંગ

વિરોધનું નેતૃત્વ કરી રહેલા નેતાઓએ પાકિસ્તાન સરકારને ખુલ્લી ચેતવણી આપી છે કે જો તેમની માંગણીઓનો સ્વીકાર નહીં થાય, તો તેમની પાસે અન્ય વિકલ્પો પણ ખુલ્લા છે. આ વિકલ્પ તરીકે તેમણે પૂંછ અને ડોડા સેક્ટરમાં નિયંત્રણ રેખા (LoC) ખોલવાની અપીલ કરી છે. જાહેરમાં એકત્ર થયેલી જનમેદનીને જ્યારે નેતાઓએ પૂછ્યું કે શું તેઓ ભારત તરફ આગળ વધવા માંગે છે, ત્યારે લોકોએ એકસૂરે 'હા' પાડી હતી. આ અપીલ પાકિસ્તાન સરકાર માટે મોટી મુશ્કેલી સાબિત થઈ શકે છે.
https://twitter.com/OsintTV/status/2073675868765884497

સ્વતંત્રતાની માંગ તરફ વળતું આંદોલન

એક સમયે આ પ્રદર્શન વીજળીના દરો અને અન્ય સુધારાઓની માંગ સાથે શરૂ થયું હતું, પરંતુ હવે તે પાકિસ્તાનથી સ્વતંત્રતાની માંગમાં પરિવર્તિત થઈ ગયું છે. લોકો જાહેરમાં સૂત્રોચ્ચાર કરી રહ્યા છે કે PoK પાકિસ્તાનનો ભાગ નથી. પાકિસ્તાની સત્તાવાળાઓએ JAAC ને આતંકવાદી સંગઠન જાહેર કરી તેના પર પ્રતિબંધ મૂક્યો છે અને લશ્કરી કાર્યવાહી તેજ કરી છે, જેનાથી સ્થિતિ વધુ વણસી છે.

નિષ્ણાતોના મતે, આ ઘટનાક્રમ પાકિસ્તાન વહીવટીતંત્ર અને સ્થાનિક જનતા વચ્ચેના અતૂટ અવિશ્વાસને દર્શાવે છે. આ માનવતાવાદી કટોકટી હવે માત્ર પાકિસ્તાનનો આંતરિક મામલો રહ્યો નથી, પરંતુ તે આંતરરાષ્ટ્રીય સ્તરે ચર્ચાનો વિષય બન્યો છે. PoKના લોકોની ભારત તરફની આ અપીલ પાકિસ્તાનની નિષ્ફળ નીતિઓ અને ત્યાંના જુલમનું જીવંત પ્રમાણ છે.


આ પણ વાંચોઃ PM Modi આજથી 3 દેશોના પ્રવાસે, ઇન્ડોનેશિયા, ઓસ્ટ્રેલિયા અને ન્યુઝીલેન્ડની મુલાકાત મહત્વની