ભારત દેશ આજે તેનો ૮૦મો સ્વતંત્રતા દિવસ ઉજવી રહ્યો છે. વડા પ્રધાન નરેન્દ્ર મોદીએ દિલ્હીના લાલ કિલ્લા પરથી રાષ્ટ્રધ્વજ ફરકાવ્યો હતો. આ વર્ષે આ કાર્યક્રમ ખાસ છે કારણ કે રાષ્ટ્રીય ગીત, વંદે માતરમની ૧૫૦મી વર્ષગાંઠ પણ ઉજવવામાં આવી રહી છે. લાલ કિલ્લા પરથી પોતાના સંબોધનમાં પીએમ મોદીએ કહ્યું કે "આગામી 10 વર્ષમાં ભારતની 50 કંપનીઓ ફોર્ચ્યુન 500માં હોવી જોઈએ." આ સાથે તેમણે દેશના લોકોને એક ટાર્ગેટ આપતા કહ્યું કે આગામી સમયમાં વિશ્વની ટોચની 5 બેંકો અને ફાર્મા કંપનીઓમાં ભારતનું પ્રભુત્વ હોવું જોઈએ.
પીએમ મોદીએ આગામી દાયકા માટે ફોર્ચ્યુન 500નો ટાર્ગેટ
દેશને સંબોધિત કરતી વખતે વડાપ્રધાન નરેન્દ્ર મોદીએ ભારતની ક્ષમતા અને રાષ્ટ્રશક્તિને નવી ઊંચાઈઓ પર લઈ જવા માટે એક મોટું અને પ્રેરણાદાયી આહ્વાન કર્યું છે. તેમણે સ્પષ્ટ કર્યું કે દેશ માત્ર સરકારથી નથી બનતો, પરંતુ તેમાં દરેક નાગરિકનો સમાવેશ થાય છે. PM મોદીએ દેશને હચમચાવી મૂકે તેવા લક્ષ્યો નક્કી કરીને વૈશ્વિક સ્તરે ભારતનું નેતૃત્વ સ્થાપિત કરવાનો સંકલ્પ વ્યક્ત કર્યો હતો. વડાપ્રધાને દેશના આર્થિક ભવિષ્યનો રોડમેપ રજૂ કરતા પ્રશ્ન કર્યો હતો કે, "આપણે વૈશ્વિક સ્તરે ફોર્ચ્યુન 500 કંપનીઓ વિશે ઘણું સાંભળીએ છીએ. આગામી દાયકામાં આ 500માંથી ઓછામાં ઓછી 50 કંપનીઓ ભારતની કેમ ન હોઈ શકે? આ આપણું મુખ્ય લક્ષ્ય હોવું જ જોઈએ."