વર્ષ 2026 અને 2027 દરમિયાન વિશ્વએ અત્યાર સુધીની સૌથી ભયાનક ગરમીનો સામનો કરવો પડી શકે છે. હવામાન વૈજ્ઞાનિકોના અંદાજ મુજબ, પ્રશાંત મહાસાગરમાં આકાર લઈ રહેલો અલ-નીનો 19મી સદી પછીનો સૌથી શક્તિશાળી અલ-નીનો બની શકે છે. આ વખતે પૂર્વ પ્રશાંત મહાસાગરમાં દરિયાઈ સપાટીનું તાપમાન સામાન્ય કરતાં લગભગ 3 ડિગ્રી સેલ્સિયસ સુધી વધી શકે છે, જે સામાન્ય અલ-નીનોમાં 1 થી 2 ડિગ્રી સેલ્સિયસ વધતું હોય છે.
વૈશ્વિક હવામાન અને ભારતીય ચોમાસા પર અસર
અલ-નીનોના કારણે સમુદ્રની વધારાની ગરમી વાતાવરણમાં ભળતાં હવા અને વરસાદની વૈશ્વિક પેટર્ન બદલાઈ જાય છે. આ ફેરફારોને કારણે વિશ્વના કેટલાક વિસ્તારોમાં ભારે વરસાદ અને પૂરની સ્થિતિ સર્જાશે, જ્યારે અન્ય વિસ્તારોમાં ગંભીર દુષ્કાળ અને કાળઝાળ ગરમી પડશે. ભારત માટે પણ આ સ્થિતિ ચિંતાજનક છે, કારણ કે મજબૂત અલ-નીનો સામાન્ય રીતે નબળા ચોમાસા સાથે જોડાયેલો હોય છે.