ભારતીય વાયુસેના દ્વારા ગાઝિયાબાદના હિંડન એર ફોર્સ સ્ટેશન ખાતે તેનો 94મો સ્થાપના દિન અત્યંત ઉત્સાહ અને ભવ્યતા સાથે 8 ઓક્ટોબર 2026ના રોજ મસૂદ કરવામાં આવ્યો હતો. આ કાર્યક્રમમાં વાયુસેનાની ઓપરેશનલ ક્ષમતાઓ, તકનીકી પ્રગતિ, વ્યાવસાયીકરણ અને સમૃદ્ધ વારસાનું અદભુત પ્રદર્શન જોવા મળ્યું હતું. આ ઐતિહાસિક પરેડની સમીક્ષા ચીફ ઓફ ધ એર સ્ટાફ, એર ચીફ માર્શલ એપી સિંહ દ્વારા કરવામાં આવી હતી. આ પ્રસંગે આર્મી ચીફ, નેવલ ચીફ, ભૂતપૂર્વ એર ચીફ્સ અને અન્ય વરિષ્ઠ સૈન્ય અધિકારીઓ ઉપસ્થિત રહ્યા હતા.
પરેડનું આકર્ષણ અને એરિયલ સલ્યુટ
સમારોહની શરૂઆત રાષ્ટ્રધ્વજ અને વાયુસેનાના ધ્વજ સાથે 'ધ્વજ' ફોર્મેશનમાં ઉડતા ત્રણ Mi-17 1V હેલિકોપ્ટરો દ્વારા એર ચીફ માર્શલને એરિયલ સલ્યુટ આપીને થઈ હતી. ગ્રૂપ કેપ્ટન મનીષ શર્માના નેતૃત્વમાં પરેડ યોજાઈ હતી. વિશિષ્ટ સેવાઓ માટે એર વોરિયર્સને મેડલથી સન્માનિત કરવામાં આવ્યા હતા. આ વર્ષની એરફોર્સ ડે ની થીમ 'ભારતીય વાયુસેના: અચૂક, અભેદ્ય વ સચોટ' રાખવામાં આવી હતી.
એર ચીફ માર્શલનું સંબોધન અને આત્મનિર્ભરતા પર ભાર
એર ચીફ માર્શલ એપી સિંહે પોતાના સંબોધનમાં જણાવ્યું હતું કે, રાષ્ટ્રીય હિતોના રક્ષણ માટે એર પાવર એ પ્રાથમિક માધ્યમ છે. તેમણે ભારપૂર્વક જણાવ્યું કે "આત્મનિર્ભરતા" અમારો મુખ્ય સિદ્ધાંત છે. આધુનિક યુદ્ધમાં આર્મી અને નેવી સાથે સંયુક્ત આયોજન અને સંકલન ખૂબ જ જરૂરી છે. આ ઉપરાંત, અવકાશ ક્ષેત્રે ISRO સાથે વધતા સહયોગ અને ગગનયાન મિશનમાં વાયુસેનાની ભૂમિકા વિશે પણ ઉલ્લેખ કરવામાં આવ્યો હતો. ઉજવણી દરમિયાન 24 સ્ક્વોડ્રન 'ધ હોક્સ', 110 હેલિકોપ્ટર યુનિટ 'ધ વ્હાર્ગાર્ડ્સ' સહિત પાંચ યુનિટને સિટેશન એનાયત કરાયા હતા.
આકર્ષક એર શો અને આગામી કાર્યક્રમ
આ કાર્યક્રમમાં વિન્ટેજ 'ટાઈગર મોથ' વિમાન દ્વારા એરિયલ ડિસ્પ્લે, 'ટીમ શક્તિ' (ઓલ-વુમન એર વોરિયર ડ્રીલ ટીમ) નું શાનદાર પ્રદર્શન અને ડ્રમર્સ ટીમની કલાબાજીએ ઉપસ્થિત સૌ કોઈના દિલ જીતી લીધા હતા. હિંડન ખાતેની ઉજવણી બાદ આગામી 25 ઓક્ટોબર 2026ના રોજ વાયુસેના દિવસનું એરિયલ ડિસ્પ્લે વારાણસીના નમો ઘાટ ખાતે યોજાશે.
આ પણ વાંચો: Navratri 2026: ફ્રી ગરબા પાસ સાયબર ફ્રોડ, જાણો સાયબર ગઠિયાનો નવો કીમિયો
