ભારતીય નૌસેનાની તાકાતમાં રવિવારે એક નવો સુવર્ણ અધ્યાય ઉમેરાયો છે. કોલકાતાના શ્યામા પ્રસાદ મુખર્જી પોર્ટ પર આયોજિત એક ભવ્ય કાર્યક્રમમાં વડાપ્રધાન નરેન્દ્ર મોદીએ ત્રણ અત્યાધુનિક અને સંપૂર્ણ સ્વદેશી યુદ્ધજહાજો – INS અગ્રય (INS Agray), INS દૂનાગીરી (INS Dunagiri) અને INS સંશોધક (INS Sanshodhak) ને ભારતીય નૌસેનામાં સામેલ (કમિશન) કર્યા છે.
આ ખાસ અવસરે પીએમ મોદીએ જણાવ્યું કે, "દુનિયા આ વાતની સાક્ષી છે કે દરિયાઈ ક્ષમતાઓ વિના કોઈ પણ દેશ મહાસત્તા બની શકતો નથી. ભવિષ્યનો વિકાસ, સુરક્ષા અને સમૃદ્ધિ સમુદ્ર સાથે જોડાયેલા છે." સંજોગવશાત ૨૧ જૂને આંતરરાષ્ટ્રીય યોગ દિવસ અને 'વિશ્વ હાઇડ્રોગ્રાફી દિવસ' બંને છે, તેથી આજના દિવસે જ દેશના સૌથી આધુનિક હાઇડ્રોગ્રાફી જહાજ INS સંશોધકને નૌસેનામાં સામેલ કરવું એ ભારત માટે ગર્વની ક્ષણ છે.
આત્મનિર્ભર ભારતની મિસાલ
આ ત્રણેય ફ્રન્ટલાઈન પ્લેટફોર્મને ભારતીય નૌસેનાના 'વોરશિપ ડિઝાઇન બ્યુરો' દ્વારા ડિઝાઇન કરવામાં આવ્યા છે અને ગાર્ડન રીચ શિપબિલ્ડર્સ એન્ડ એન્જિનિયર્સ (GRSE), કોલકાતા દ્વારા બનાવવામાં આવ્યા છે. આ પ્રોજેક્ટમાં 200થી વધુ MSME સામેલ હતા, જેનાથી મોટા પાયે રોજગારીની તકો પણ ઊભી થઈ છે.
જાણો ત્રણેય જહાજોની ખાસિયતો અને તાકાત:
INS દૂનાગીરી (સ્ટીલ્થ ફ્રિગેટ):
પ્રોજેક્ટ 17A હેઠળ બનેલું આ 149 મીટર લાંબુ અને 6,670 ટન વજન ધરાવતું મહાબલી યુદ્ધજહાજ છે. તે દુશ્મનના રડારને ચકમો આપવામાં સક્ષમ (Stealth Technology) છે. તે સમુદ્રથી સમુદ્રમાં માર કરનારી ઘાતક બ્રહ્મોસ મિસાઈલ અને મીડિયમ રેન્જ સરફેસ-ટુ-એર મિસાઈલ સિસ્ટમથી સજ્જ છે.
INS સંશોધક (સર્વે વેસલ - લાર્જ):
આ 3,400 ટન વજન ધરાવતું ભારતનું સૌથી આધુનિક હાઇડ્રોગ્રાફિક સર્વે જહાજ છે. તેનું મુખ્ય કામ ઊંડા સમુદ્રના નકશા તૈયાર કરવા, ભૌગોલિક પરિસ્થિતિઓ પર નજર રાખવી અને ડેટા એકત્રિત કરવાનું છે. તે ઓટોનોમસ અંડરવોટર વ્હીકલ જેવા આધુનિક સાધનોથી સજ્જ છે.
INS અગ્રય (એન્ટી-સબમરીન વોરફેર ક્રાફ્ટ):
ઓછા ઊંડા પાણીમાં દુશ્મનની સબમરીન (પાનડુબ્બી) ને શોધીને નષ્ટ કરવા માટે આ ૭૭ મીટર લાંબુ જહાજ અત્યંત ચપળ છે. તે સ્વદેશી રોકેટ લોન્ચર અને સોનાર સિસ્ટમથી સજ્જ છે, જે ભારતની દરિયાઈ સરહદ અને તટીય વિસ્તારોનું રક્ષણ કરશે.
આ ત્રણેય જહાજો ભારતીય નૌસેનાની યુદ્ધ ક્ષમતા, બ્લુ-વોટર ઓપરેશન્સ અને સમુદ્રી સુરક્ષાના સંતુલિત દ્રષ્ટિકોણને મજબૂત કરે છે.
આ પણ વાંચો:Europeમાં કાળઝાળ ગરમીથી લોકો પરેશાન, ફ્રાન્સમાં દારૂ પીવા પર પ્રતિબંધ, જર્મની-ઇટાલી-સ્પેનમાં રેડ એલર્ટ
