હૈદરાબાદથી ચંદીગઢ જઈ રહેલી ઈન્ડિગોની ફ્લાઈટમાં ગંભીર ઘટના બની છે. મળતી માહિતી મુજબ, ફ્લાઈટ નંબર 6E 108માં એક મુસાફરનો પાવર બેન્ક બ્લાસ્ટ થવાથી અચાનક ધુમાડો ફેલાઈ ગયો અને બાદમાં આગ પણ લાગી હતી. આ ઘટના ત્યારે બની જ્યારે વિમાન ચંદીગઢ એરપોર્ટ પર લેન્ડિંગ પ્રક્રિયામાં હતું.
એર હોસ્ટેસની ઝડપી કામગીરીના કારણે આગ પર કાબૂ મેળવવામાં આવ્યો
પાવર બેન્ક મુસાફરના બેગમાં રાખવામાં આવી હતી અને તે અચાનક ગરમ થઈને ફાટી ગઈ હતી. ફ્લાઈટમાં ધુમાડો ફેલાતા મુસાફરોમાં ગભરાટ ફેલાયો હતો. થોડા સમય માટે પરિસ્થિતિ તણાવપૂર્ણ બની ગઈ હતી, પરંતુ એર હોસ્ટેસની ઝડપી કામગીરીના કારણે આગ પર કાબૂ મેળવવામાં આવ્યો હતો અને મોટી દુર્ઘટના ટળી ગઈ હતી. ઘટના બાદ તરત જ વિમાનને સુરક્ષાના હેતુથી ખાલી કરાવવામાં આવ્યું હતું. ઈન્ડિગો એરલાઈન દ્વારા જણાવવામાં આવ્યું કે તમામ મુસાફરોને સલામત રીતે ટર્મિનલ સુધી પહોંચાડવામાં આવ્યા છે. ત્યાં એરલાઈનની ટીમે મુસાફરોની મદદ કરી અને જરૂરી સુવિધાઓ પૂરી પાડી હતી.