CCTV ફૂટેજ અને તપાસમાં અનેક મહત્વપૂર્ણ ખુલાસા થયા છે. જ્યારે પોલીસ અન્ય સંભવિત આરોપીઓની ભૂમિકાની પણ તપાસ કરી રહી છે.
પોલીસ તપાસમાં અનેક ખુલાસા
દિલ્હીના અમર કોલોની વિસ્તારમાં IRS અધિકારીની પુત્રી પર બળાત્કાર અને હત્યાના સનસનાટીભર્યા કેસમાં સાકેત કોર્ટે આરોપી રાહુલ મીણાને ચાર દિવસના પોલીસ રિમાન્ડ પર મોકલી દીધો છે. દિલ્હી પોલીસે સંપૂર્ણ તપાસ અને પૂછપરછ માટે કસ્ટડી માંગી હતી. સુનાવણી દરમિયાન, કોર્ટે આરોપીને અનેક પ્રશ્નો પૂછ્યા હતા. જ્યારે પૂછવામાં આવ્યું કે, તે ઘરમાં કેમ ઘુસ્યો, ત્યારે રાહુલ મીણાએ જણાવ્યું કે તે ચોરીના ઇરાદાથી ઘુસ્યો હતો.
આ મારી ભૂલ હતીઃ આરોપી
ત્યારબાદ કોર્ટે તેને IRS અધિકારીની પુત્રી પર બળાત્કાર અને પછી હત્યા કરવા અંગે પૂછપરછ કરી હતી. આરોપી રાહુલ મીણાએ જવાબ આપ્યો કે તે તેની ભૂલ હતી, પરંતુ તે હાલમાં આ બાબતે વધુ ટિપ્પણી કરવા માંગતો નથી. કોર્ટે દિલ્હી પોલીસને પણ પૂછ્યું કે તેઓ આરોપીની કસ્ટડી કેમ ઇચ્છે છે. તપાસ અધિકારીએ જણાવ્યું કે ઘરેણાં અને રોકડ પહેલાથી જ મળી આવી છે, પરંતુ કેસના અન્ય પાસાઓ તપાસ હેઠળ છે.
પોલીસે કોર્ટને જાણ કરી કે તેઓ અન્ય વ્યક્તિઓની પૂછપરછ કરવા માંગે છે જેથી નક્કી કરી શકાય કે આ ગુનામાં અન્ય કોઈ સંડોવાયેલ છે કે નહીં. દિલ્હી પોલીસે જણાવ્યું કે રિમાન્ડ સમયગાળા દરમિયાન, કેસ સંબંધિત મહત્વપૂર્ણ કડીઓ એકત્રિત કરવા માટે આરોપીની સંપૂર્ણ પૂછપરછ કરવામાં આવશે. કેસની ગંભીરતાને જોતાં, પોલીસ તપાસ વધુ તીવ્ર બનાવવામાં આવી છે, અને આગામી દિવસોમાં કેસ સંબંધિત વધુ ખુલાસાઓ બહાર આવી શકે છે.
જોઈન્ટ કમિશનર વિજય કુમારની પ્રતિક્રિયા
દિલ્હી પોલીસના જોઈન્ટ કમિશનર વિજય કુમારે જણાવ્યું હતું કે, અત્યાર સુધીની તપાસમાં અનેક મહત્વપૂર્ણ ખુલાસા થયા છે. આરોપી રાહુલ મીણા ઘટનાના દિવસે લગભગ 41 મિનિટ સુધી ઘરની અંદર હાજર રહ્યો હતો અને ગુનો કર્યા પછી ભાગી ગયો હતો. બુધવારે સવારે પીડિતાના માતા-પિતાએ પોલીસને જાણ કરી કે તેમની પુત્રી ઘરમાં બેભાન હાલતમાં પડી છે. તેને તાત્કાલિક હોસ્પિટલમાં લઈ જવામાં આવી, જ્યાં ડોક્ટરોએ તેને મૃત જાહેર કરી.
આ પણ વાંચોઃ દેશને સૌથી વધુ ચોખા આપનારું રાજ્ય કયુ?, જેની ઇરાન સુધી છે માગ, જાણો