છેલ્લા સપ્તાહમાં દેશમાં ખાંડના ભાવમાં વધારો નોંધાયો છે. 20 જુલાઈ 2026ના રોજ ખાંડનો ભાવ ₹48.18 પ્રતિ કિલો હતો, જે 20 ઓગસ્ટ સુધીમાં વધીને ₹55.70 પ્રતિ કિલો થયો છે. આમ એક જ મહિનામાં પ્રતિ કિલો ₹7.52નો વધારો જોવા મળ્યો છે. ભાવ વધારાને ડામવા સરકારે જરૂરી પગલાં લેવાની શરૂઆત કરી છે. સરકારે સ્પષ્ટ કર્યું છે કે ખાંડના ભાવ વધારા માટે ઇથેનોલ ઉત્પાદન જવાબદાર નથી.
આંતરરાષ્ટ્રીય બજારમાં બે મહિનામાં ભાવ 16%થી વધુ વધ્યા
આંકડા અનુસાર, ઇથેનોલ માટે ડાયવર્ટ કરવામાં આવતી ખાંડનો હિસ્સો 2022-23માં 12% હતો જે ઘટીને 2025-26માં આશરે 9% થયો છે. ઉપરાંત, દેશમાં બનતું લગભગ પોણા ભાગનું ઇથેનોલ હવે અનાજ, ખાસ કરીને મકાઈમાંથી તૈયાર થાય છે. ચાલુ સિઝનમાં દેશમાં ખાંડનું ઉત્પાદન 306 લાખ ટન રહેવાનો અંદાજ છે. શેરડીના પાકને રોગ અને ભારે વરસાદથી નુકસાન થયું હોવા છતાં, ઓક્ટોબરમાં નવી સિઝન શરૂ થાય ત્યાં સુધી દેશમાં પર્યાપ્ત સ્ટોક ઉપલબ્ધ છે. વિશ્વભરમાં પણ ખાંડનો પુરવઠો ઘટવાની ચિંતા વચ્ચે આંતરરાષ્ટ્રીય બજારમાં બે મહિનામાં ભાવ 16%થી વધુ વધ્યા છે.