Jammu Kashmir Flood : ગૃહપ્રધાન અમિત શાહે પૂર પ્રભાવિત વિસ્તારની લીધી મુલાકાત, પૂરગ્રસ્ત લોકોને મળીને મદદ પૂરી પાડવાની ખાતરી આપી

જમ્મુ અને કાશ્મીરમાં વરસાદ અને ભૂસ્ખલનને કારણે પરિસ્થિતિ ખૂબ જ ખરાબ થઈ ગઈ છે. સતત વરસાદને કારણે લોકોને ઘણી મુશ્કેલીઓનો સામનો કરવો પડી રહ્યો છે. આ દરમિયાન, સોમવારે (1 સપ્ટેમ્બર) કેન્દ્રીય ગૃહમંત્રી અમિત શાહે જમ્મુની મુલાકાત લીધી હતી અને પૂરગ્રસ્ત લોકોને મળ્યા છે. મંત્રીએ તેમને રાહત અને પુનર્વસન પૂરું પાડવાની ખાતરી પણ આપી છે.

આ દરમિયાન કેન્દ્રીય મંત્રી સાથે લેફ્ટનન્ટ ગવર્નર મનોજ સિંહા, મુખ્યપ્રધાન ઓમર અબ્દુલ્લા અને જમ્મુ અને કાશ્મીર વિધાનસભામાં વિરોધ પક્ષના નેતા સુનીલ શર્મા પણ હાજર રહ્યા. જમ્મુના વિભાગીય કમિશનર રમેશ કુમાર અને અન્ય વરિષ્ઠ અધિકારીઓએ પરિસ્થિતિ વિશે માહિતી આપી. અમિત શાહ રવિવારે રાત્રે પૂરની પરિસ્થિતિ અને રાહત કાર્યનો તાગ મેળવવા માટે જમ્મુ પહોંચ્યા છે.

કેન્દ્રીય ગૃહપ્રધાન પૂરગ્રસ્ત લોકોને મળ્યા

અમિત શાહે જમ્મુ વિભાગમાં વરસાદ, પૂર અને ભૂસ્ખલનથી પ્રભાવિત વિસ્તારોની મુલાકાત લીધી અને કુદરતી આફતથી થયેલા નુકસાનનો અંદાજ કાઢ્યો. તેમણે ચક માંગુ ગામના પૂરગ્રસ્ત લોકોને મળ્યા અને જમ્મુમાં પૂરથી નુકસાન પામેલા તાવી પુલ, શિવ મંદિર અને ઘરોનું પણ નિરીક્ષણ કર્યું. અધિકારીઓએ જણાવ્યું કે મંત્રીએ ગ્રામજનો સાથે વાતચીત કરી અને તેમને યોગ્ય રાહત અને પુનર્વસન પૂરું પાડવાની ખાતરી આપી. ગૃહમંત્રીની અધ્યક્ષતામાં એક ઉચ્ચ સ્તરીય બેઠક યોજાઈ હતી, જેમાં તાજેતરની પરિસ્થિતિની સમીક્ષા કરવામાં આવી. મંત્રીએ આદેશ આપ્યો હતો કે હવામાન વિભાગ અને NDMA ડેટા એનાલિટિક્સ અને AIનો ઉપયોગ કરીને વાદળ ફાટવાના કારણોનો અભ્યાસ કરે.

ગૃહપ્રધાને કુદરતી આફતોની ઘટનાઓમાં થયેલી જાનહાનિ પર દુઃખ વ્યક્ત કર્યું

અમિત શાહે તાજેતરની કુદરતી આફતોની ઘટનાઓમાં થયેલી જાનહાનિ પર દુઃખ વ્યક્ત કર્યું. તેમણે એમ પણ કહ્યું કે મોદી સરકાર જમ્મુ અને કાશ્મીરના લોકોની સાથે મજબૂતીથી ઉભી છે અને સુરક્ષા, પુનર્વસન અને પુનર્નિર્માણને સરળ બનાવવા માટે તાત્કાલિક રાહત, નાણાકીય સહાય અને તકનીકી સહાય પૂરી પાડી રહી છે. ગૃહ મંત્રાલયની સર્વે ટીમો ટૂંક સમયમાં નુકસાનનું મૂલ્યાંકન કરવા માટે અહીં આવશે અને ત્યારબાદ તાત્કાલિક સહાય પૂરી પાડવામાં આવશે. જમ્મુ અને કાશ્મીર વહીવટીતંત્ર અને બધી એજન્સીઓએ મળીને સંભવિત નુકસાનને ઘણી હદ સુધી ઘટાડ્યું છે અને સંકલિત પ્રયાસોથી અમે ઘણા લોકોના જીવ બચાવવામાં સફળ થયા છીએ, પરંતુ સિસ્ટમને વધુ મજબૂત બનાવવાની જરૂર છે. 14 ઓગસ્ટથી કિશ્તવાડ, કઠુઆ, રિયાસી અને રામબન જિલ્લામાં વાદળ ફાટવા, ભૂસ્ખલન અને અચાનક પૂરને કારણે 130થી વધુ લોકો મૃત્યુ પામ્યા છે અને 33 લોકો ગુમ છે.