જમ્મુ અને કાશ્મીરના રિયાસી અને રાજૌરી જિલ્લામાં પડી રહેલા ભારે વરસાદને કારણે જનજીવન અસ્તવ્યસ્ત થઈ ગયું છે. સતત વરસાદના કારણે ચિનાબ નદી અને સલાલ ડેમના જળાશયમાં પાણીનું સ્તર ભયજનક સપાટી તરફ વધી રહ્યું છે. સ્થિતિને કાબૂમાં રાખવા અને જળાશયનું સ્તર જાળવી રાખવા માટે મંગળવારે સલાલ ડેમના તમામ દરવાજા ખોલીને વધારાનું પાણી સુરક્ષિત રીતે છોડવામાં આવ્યું હતું.
ચિનાબ નદીના જળસ્તરમાં થયો વધારો
પાણી છોડવામાં આવતા ચિનાબ નદીના પ્રવાહ અને જળસ્તરમાં અચાનક મોટો વધારો થયો છે. આ સ્થિતિને ધ્યાનમાં રાખીને સ્થાનિક વહીવટીતંત્ર દ્વારા નદી કિનારે અને નીચાણવાળા વિસ્તારોમાં રહેતા નાગરિકો માટે કડક ચેતવણી જારી કરવામાં આવી છે. પ્રશાસને લોકોને બિનજરૂરી રીતે નદી કે તેના કિનારાની આસપાસ ન જવા ખાસ અપીલ કરી છે. અધિકારીઓ દ્વારા નદીના જળસ્તર પર સતત નજર રાખવામાં આવી રહી છે જેથી કોઈપણ કટોકટીનો સમયસર સામનો કરી શકાય.
લોકોને સતર્ક રહેવા કરાઇ અપીલ
દરમિયાન, રાજૌરી જિલ્લામાં પણ સવારથી જ મુશળધાર વરસાદ વરસી રહ્યો છે. જિલ્લા વહીવટીતંત્ર અને રાજૌરી પોલીસે સંયુક્ત સલાહકાર જારી કરીને લોકોને અત્યંત આવશ્યક કામ હોય તો જ ઘરની બહાર નીકળવા જણાવ્યું છે. સતત વરસાદને કારણે અચાનક પૂર, ભૂસ્ખલન અને માર્ગો પર પાણી ભરાવવાની પૂરી સંભાવના છે. પ્રશાસને નાગરિકોને પાણી ભરાયેલા રસ્તાઓ કે પુલો પાર ન કરવા અને હવામાન વિભાગની સૂચનાઓનું ચુસ્તપણે પાલન કરવા તાકીદ કરી છે.
વહીવટીતંત્ર દ્વારા સતત સુરક્ષા વ્યવસ્થા પર રખાઇ નજર
કટોકટીની કોઈપણ સ્થિતિમાં તાત્કાલિક સ્થાનિક પ્રશાસન અથવા આપત્તિ વ્યવસ્થાપન સેવાઓનો સંપર્ક કરવા માટે પણ નાગરિકોને જાગૃત કરવામાં આવ્યા છે. જમ્મુ અને કાશ્મીરના અનેક વિસ્તારોમાં આ કુદરતી આફત અને ખરાબ હવામાનને કારણે ચિંતાનું વાતાવરણ છવાયેલું છે, ત્યારે વહીવટીતંત્ર દ્વારા સતત સુરક્ષા વ્યવસ્થાઓ પર નજર રાખવામાં આવી રહી છે.
આ પણ વાંચોઃ શું AI ખરેખર ફ્રેશર્સની કારકિર્દી માટે જોખમ બન્યું? અભ્યાસ પૂરો પરંતુ યુવાનો પાસે જોબ નથી!
