ઝારખંડની રાજધાની રાંચીમાં તાજેતરમાં થયેલા વિદ્યાર્થીઓના ઉગ્ર વિરોધ પ્રદર્શન સામે પોલીસે મોટી કાનૂની કાર્યવાહી હાથ ધરી છે. ગત ૧૦ ઓગસ્ટે ઝારખંડ વિધાનસભાનો ઘેરાવ કરવા માટે કૂચ કરી રહેલા પ્રદર્શનકારીઓ સામે પોલીસે સખ્ત વલણ અપનાવ્યું છે. વિધાનસભા કૂચ દરમિયાન થયેલા પથ્થરમારો, હિંસા અને પોલીસ સાથેની અથડામણોને ગંભીરતાથી લઈને પોલીસે કુલ ૬૦૦ વિરોધીઓ સામે એફઆઈઆર (FIR) દાખલ કરી છે. આ ગુનામાં 100 નામાંકિત અગ્રણી વિરોધીઓ અને ૫૦૦ અજાણ્યા વ્યક્તિઓનો સમાવેશ થાય છે.
શું હતી ઘટના?
મળતી માહિતી મુજબ, ૧૦ ઓગસ્ટના રોજ વિદ્યાર્થીઓએ જેપીએસસી (JPSC) અને જેએસએસસી (JSSC) ભરતી પરીક્ષાઓમાં કથિત ગેરરીતિઓ સામે વિરોધ નોંધાવવા માટે "વિધાનસભા ઘેરાબંધી"નું આહ્વાન કર્યું હતું. આ દરમિયાન જ્યારે ઉશ્કેરાયેલા પ્રદર્શનકારીઓએ સુરક્ષા દળોની ઘેરાબંધી તોડીને આગળ વધવાનો પ્રયાસ કર્યો, ત્યારે પરિસ્થિતિ અત્યંત તણાવપૂર્ણ બની ગઈ અને પોલીસ સાથે ભીષણ અથડામણ થઈ હતી. બેકાબૂ બનેલી ભીડને નિયંત્રણમાં લાવવા માટે પોલીસે લાઠીચાર્જ કરવો પડ્યો હતો તેમજ પાણીના તોપ અને ટીયર ગેસના શેલ છોડવાની ફરજ પડી હતી.
https://twitter.com/MeghUpdates/status/2087797713832443932
વિદ્યાર્થીઓનું આંદોલન યથાવત અને સરકારના દાવા
પોલીસ કાર્યવાહી છતાં વિદ્યાર્થીઓ પોતાની માંગણીઓ પર મક્કમ છે અને હાલ રાંચીના જયપાલ મુંડા સ્ટેડિયમમાં તેમનું વિરોધ પ્રદર્શન યથાવત છે. આ વિવાદને ઉકેલવા માટે સરકાર અને વિદ્યાર્થી પ્રતિનિધિઓ વચ્ચે વાતચીતના ઘણા રાઉન્ડ યોજાઈ ચૂક્યા છે, પરંતુ જેએસએસસી-સીજીએલ પરીક્ષા અને સમગ્ર ભરતી પ્રક્રિયા અંગે હજુ સુધી કોઈ નક્કર સમજૂતી સધાઈ શકી નથી. સરકાર તરફથી દાવો કરવામાં આવી રહ્યો છે કે વિદ્યાર્થીઓની ૯૮ ટકા માંગણીઓ સ્વીકારી લેવામાં આવી છે. એટલું જ નહીં, જેપીએસસીનું વિસર્જન પણ કરી દેવામાં આવ્યું છે અને તેના ત્રણેય સભ્યોએ રાજીનામું આપી દીધું છે. મુખ્યમંત્રી હેમંત સોરેને પણ વિદ્યાર્થીઓને પત્ર લખીને તેમની ચિંતાઓ દૂર કરવાનો અને આશ્વાસન આપવાનો પ્રયાસ કર્યો છે.
CBI તપાસની માંગ પર વિદ્યાર્થીઓ અડગ
પરંતુ બીજી તરફ, આ તમામ પગલાં છતાં વિદ્યાર્થીઓ સમગ્ર પ્રકરણની સીબીઆઈ (CBI) તપાસ કરાવવાની પોતાની મુખ્ય માંગ પર અડગ છે. સરકાર અને પ્રદર્શનકારીઓ વચ્ચે હજુ પણ મુખ્ય મુદ્દાઓ પર ગતિરોધ યથાવત છે, જેના કારણે આગામી દિવસોમાં રાજકીય અને સામાજિક મોરચે હલચલ વધુ તેજ થવાની પૂરી સંભાવના છે.
આ પણ વાંચોઃ Skin Tips: નાની ઉંમરમાં ત્વચા પર થઇ ગયા છે ખીલ? માત્ર આ 3 સ્ટેપ્સ અને સ્કીન થશે એકદમ ચમકદાર!
