ધુમ્મસમાં પણ વિમાન સુરક્ષિત લેન્ડ થશે,જાણો જેવર એરપોર્ટની હાઇટેક'ILS' ટેકનોલોજી છે શું?

ભારતના ઉડ્ડયન ઇતિહાસમાં 28 માર્ચ, 2026નો દિવસ સુવર્ણ અક્ષરે લખાશે. પ્રધાનમંત્રી નરેન્દ્ર મોદી ગૌતમ બુદ્ધ નગરના જેવર ખાતે નિર્મિત નોઈડા ઈન્ટરનેશનલ એરપોર્ટ (NIA) ના પ્રથમ તબક્કાનું ભવ્ય ઉદ્ઘાટન કરશે. આ એરપોર્ટ દિલ્હી-NCRનું બીજું આંતરરાષ્ટ્રીય એરપોર્ટ બનશે, જે ઈન્દિરા ગાંધી ઈન્ટરનેશનલ એરપોર્ટ પરના બોજને ઘટાડશે અને આ વિસ્તારને વૈશ્વિક એવિએશન હબ તરીકે સ્થાપિત કરશે.

નિર્ધારિત કાર્યક્રમ મુજબ, પીએમ મોદી સવારે 11:30 વાગ્યે ટર્મિનલ બિલ્ડિંગનું નિરીક્ષણ કરશે અને બપોરે 12 વાગ્યે ફેઝ-I રાષ્ટ્રને સમર્પિત કરશે. આ પ્રોજેક્ટ ₹11,200 કરોડના ખર્ચે PPP મોડેલ હેઠળ તૈયાર કરવામાં આવ્યો છે. શરૂઆતમાં તેની ક્ષમતા વાર્ષિક 1.2 કરોડ મુસાફરોની રહેશે, જે ભવિષ્યમાં વધીને 7 કરોડ સુધી પહોંચશે.

આ એરપોર્ટની સૌથી મોટી વિશેષતા તેની ઇન્સ્ટ્રુમેન્ટ લેન્ડિંગ સિસ્ટમ (ILS) છે. તે એક રેડિયો-સિગ્નલ આધારિત નેવિગેશન ટેકનોલોજી છે.જ્યારે અતિશય ધુમ્મસ, ભારે વરસાદ કે અંધકારને કારણે વિઝિબિલિટી (દૃશ્યતા) ઓછી હોય, ત્યારે આ સિસ્ટમ પાઈલટને સુરક્ષિત લેન્ડિંગ માટે સચોટ માર્ગદર્શન આપે છે.આમાં 'લોકલાઈઝર' (ડાબે-જમણે માર્ગદર્શન), 'ગ્લાઈડ સ્લોપ' (ઉપર-નીચેનું અંતર), અને 'એપ્રોચ લાઈટિંગ' જેવા સાધનો કામ કરે છે. તે વિમાનને રનવેની બરાબર મધ્યમાં ઉતારવામાં મદદ કરે છે.

3,900 મીટરનો રનવે: આ રનવે એટલો વિશાળ છે કે તે દુનિયાના સૌથી મોટા વાઈડ-બોડી એરક્રાફ્ટને પણ સરળતાથી હેન્ડલ કરી શકશે.પર્યાવરણને ધ્યાનમાં રાખીને તેને ઊર્જા-કાર્યક્ષમ બનાવવામાં આવ્યું છે, જે પ્રદૂષણ ઘટાડવામાં મદદ કરશે.અદ્યતન એરફિલ્ડ લાઈટિંગને કારણે કોઈપણ હવામાનમાં અહીં વિમાનોની અવરજવર ચાલુ રહેશે.નિષ્ણાતોના મતે, આ એરપોર્ટ માત્ર મુસાફરી સરળ નહીં બનાવે, પરંતુ પશ્ચિમ ઉત્તર પ્રદેશ અને દિલ્હી આસપાસના વિસ્તારોમાં આર્થિક વિકાસ અને રોજગારીની નવી તકો પણ ઊભી કરશે.