Lucknow Fire Incident : અગ્નિકાંડની તપાસ કરવા માટે SITની કરાઈ રચના, 7 દિવસમાં અહેવાલ સોંપવા આદેશ

લખનઉમાં બનેલી ભયાનક અગ્નિકાંડની ઘટનાને લઈને ઉત્તર પ્રદેશ સરકાર એક્શનમાં આવી ગઈ છે. મુખ્યમંત્રી યોગી આદિત્યનાથના નિર્દેશ બાદ ઘટનાની વિગતવાર તપાસ માટે બે સભ્યોની વિશેષ તપાસ ટીમ (SIT)ની રચના કરવામાં આવી છે. સરકારનો હેતુ આગ લાગવાના કારણો, સુરક્ષા વ્યવસ્થામાં રહેલી ખામીઓ અને જવાબદારોની ઓળખ કરીને જરૂરી કાર્યવાહી કરવાનું છે.

બેઠક બાદ SITની રચના કરવાનો નિર્ણય લેવામાં આવ્યો

મુખ્યમંત્રી યોગી આદિત્યનાથે ઘટનાને ગંભીરતાથી લઈ ઉચ્ચ સ્તરીય બેઠક યોજી હતી. આ બેઠક બાદ SITની રચના કરવાનો નિર્ણય લેવામાં આવ્યો હતો. સરકારે SITને સાત કાર્યકારી દિવસની અંદર તપાસ પૂર્ણ કરીને પોતાનો અહેવાલ રાજ્ય સરકારને સોંપવાનો આદેશ આપ્યો છે. વિશેષ તપાસ ટીમમાં પ્રવાસન, ચેરિટેબલ અને સંસ્કૃતિ વિભાગના અતિરિક્ત મુખ્ય સચિવ અમૃત અભિજાતને સભ્ય તરીકે સામેલ કરવામાં આવ્યા છે. જ્યારે લખનઉ ઝોનના એડિશનલ ડિરેક્ટર જનરલ ઓફ પોલીસ (ADG) પ્રવીણ કુમારને SITના બીજા સભ્ય તરીકે નિયુક્ત કરવામાં આવ્યા છે.

જવાબદાર લોકો સામે કડક કાર્યવાહી કરવામાં આવશે

તપાસ દરમિયાન આગ લાગવાના મૂળ કારણો, ઈમારતમાં આગ સુરક્ષા નિયમોનું પાલન થયું હતું કે નહીં, બચાવ કામગીરીમાં કોઈ બેદરકારી રહી હતી કે કેમ અને સંબંધિત વિભાગોની જવાબદારી જેવા મુદ્દાઓની ઊંડાણપૂર્વક તપાસ કરવામાં આવશે. સાથે જ ભવિષ્યમાં આવી દુર્ઘટનાઓ અટકાવવા માટે જરૂરી ભલામણો પણ અહેવાલમાં સામેલ કરવામાં આવશે.

મુખ્યમંત્રી યોગી આદિત્યનાથે સ્પષ્ટ કર્યું છે કે જો તપાસમાં કોઈપણ પ્રકારની બેદરકારી અથવા નિયમોનું ઉલ્લંઘન સામે આવશે તો જવાબદાર લોકો સામે કડક કાર્યવાહી કરવામાં આવશે. રાજ્ય સરકાર ઘટનાના પીડિતોને ન્યાય મળે અને આવી ઘટનાઓ ફરી ન બને તે માટે પ્રતિબદ્ધ હોવાનું પણ તેમણે જણાવ્યું. આ SIT તપાસના પરિણામો હવે સમગ્ર રાજ્ય માટે મહત્વપૂર્ણ માનવામાં આવી રહ્યા છે, કારણ કે તે આગ સુરક્ષા વ્યવસ્થાઓ અંગેના અનેક પ્રશ્નોના જવાબ આપી શકે છે.

આ પણ વાંચો : Lucknow Fire Incident : CM યોગી પોતાનો પ્રવાસ અટકાવી લખનઉં પહોંચ્યા, પીડિતોના પરિવારજન સાથે કરી મુલાકાત