Maharashtra: નાસિકમાં મોટો અકસ્માત, કાર-બાઇક વચ્ચે ટક્કર થતા 7ના મોત

મહારાષ્ટ્રના નાસિક જિલ્લામાં એક ગમખ્વાર અકસ્માત થયો હોવાનું સામે આવ્યું છે. કાર અને મોટર સાઇકલ વચ્ચે જબરદસ્ત અથડામણ થતા 7 લોકોના મોત થયા છે. મળતી માહિતી મુજબ આ ઘટના મોડી રાત્રે ડિંડોરી વિસ્તાર પાસે થઇ હતી. બે લોકો ગંભીર રીતે ઇજાગ્રસ્ત થયા છે.

કાર અને બાઇક વચ્ચે અકસ્માત 

પોલીસ અધિકારીના જણાવ્યા મુજબ પોલીસે રાત્રે 11.57 કલાકે વાણી-ડિંડોરી રોડ પર એક નર્સરી પાસે રોડ અકસ્માતની સૂચના મળી હતી. જ્યારે પોલીસ ઘટના સ્થળે પહોંચી તો બંને વાહનો રસ્તાને છેડે નાની નહેરમાં પડી ગયેલા દેખાયા હતા. પોલીસે જણાવ્યું કે દુર્ઘટનામાં સાત લોકોના મોત થયા છે. જ્યારે અન્ય બે લોકો ઇજાગ્રસ્ત થયા છે. ઘટનાની જાણ થતા જ પોલીસ અને અન્ય લોકો પણ બચાવ અભિયાનમાં જોડાયા હતા.

બર્થડે પાર્ટીમાંથી આવી રહ્યો હતો પરિવાર 

પોલીસ હાલ આ મામલે તપાસ કરી રહી છે. પ્રાથમિક તપાસમાં જાણવા મળ્યું છે કે ટક્કર બાદ કાર અનિયંત્રિત થઇને એક નહેરમાં ખાબકી હતી. કારમાં બેઠેલા લોકો સમયસર બહાર ન નીકળી શક્યા પરિણામે તેઓના મોત થયા હોવાનું સામે આવ્યું છે. પોલીસે તમામના મૃતદેહને પીએમ માટે મોકલીને વધુ તપાસ હાથ ધરી છે. પોલીસના જણાવ્યાનુસાર કારમાં સવાર લોકો સંબંધીના પુત્રના જન્મદિવસના કાર્યક્રમમાં હાજરી આપીને નાસિક આવી રહ્યા હતા. હાલ ઇજાગ્રસ્તોની જિલ્લા હોસ્પિટલમાં સારવાર ચાલી રહી છે.