મહારાષ્ટ્રમાં હજી પણ વરસાદ રહેશે. ઓક્ટોબર સુધી વરસાદ રહેશે તેમ હવામાન વિભાગનું કહેવુ છે. ત્યારે આજે મુંબઇમાં વહેલી સવારથી જ વરસાદી માહોલ જોવા મળ્યો છે. ભારતીય હવામાન વિભાગએ મુંબઈ માટે ઓરેન્જ એલર્ટ જાહેર કર્યું છે.
મુંબઇમાં ઓરેન્જ એલર્ટ જાહેર
હવામાન વિભાગએ 27 સપ્ટેમ્બરથી ભારેથી અતિ ભારે વરસાદની આગાહી કરી છે. 28 અને 29 સપ્ટેમ્બરે પરિસ્થિતિ વધુ વણસવાની ધારણા છે. હવામાન નિષ્ણાંતો સપ્તાહના અંતે 300-400 મીમી સુધી ભારે વરસાદની આગાહી કરે છે, જે સમગ્ર શહેરમાં તહેવારોની ઉજવણીને અસર કરી શકે છે. IMD ની આગાહી મુજબ 27 સપ્ટેમ્બરથી મુંબઈમાં વરસાદની તીવ્રતા ટોચ પર પહોંચશે કારણ કે બંગાળની ખાડી પરનું નીચું દબાણ ક્ષેત્ર ડિપ્રેશનમાં પરિણમશે અને 27 સપ્ટેમ્બરની સવારની આસપાસ દક્ષિણ ઓડિશા અને ઉત્તર આંધ્રપ્રદેશના દરિયાકાંઠાને પાર કરશે.
આ દિવસે ભારેથી અતિભારે વરસી શકે
કોંકણ અને નજીકના ઘાટ વિસ્તારોમાં પણ અલગ-અલગ ભારે વરસાદની શક્યતા છે. હવામાન વિભાગે ચેતવણી આપી છે કે 27 અને 28 સપ્ટેમ્બરે મુંબઈ, થાણે અને રાયગઢમાં ભારે વરસાદ પડશે. ઓરેન્જ એલર્ટ અલગ-અલગ સ્થળોએ ભારેથી અતિ ભારે વરસાદની શક્યતા દર્શાવે છે, જેના કારણે પાણી ભરાઈ શકે છે, ટ્રાફિકમાં વિક્ષેપ પડી શકે છે અને લોકલ ટ્રેનોમાં વિલંબ થઈ શકે છે. હવામાન આગાહી કરનાર ઋષિકેશ અગ્રેએ ચેતવણી આપી હતી કે 27-28 સપ્ટેમ્બર દરમિયાન મુંબઈમાં ભારે વરસાદ પડી શકે છે.
નાગરિકોને ખાસ સૂચના
હાલ મુબઈમાં મધ્યમ વરસાદ પડી રહ્યો છે. IMD એ નીચાણવાળા શહેરી વિસ્તારોમાં પાણી ભરાવાની અને પૂર આવવાની, નબળા વૃક્ષો ઉખડી જવાની, જૂના માળખાં ધરાશાયી થવાની અને રસ્તા, રેલ, હવાઈ અને ફેરી પરિવહનમાં વિક્ષેપ પડવાની આગાહી કરી છે. દરિયાકાંઠે દરિયાઈ પરિસ્થિતિ ખરાબ રહેવાની અને કોંકણના દરિયાકાંઠાના જિલ્લાઓમાં તોફાની હવામાનની અપેક્ષા છે. ઊંચી ભરતી વરસાદની અસરને વધુ વધારી શકે છે. નાગરિકોને મુસાફરી કરતા પહેલા ટ્રાફિકની સ્થિતિ તપાસવાની તથા ટ્રાફિક સલાહનું પાલન કરવાની અને સંવેદનશીલ માળખાં ટાળવાની અને વાવાઝોડા દરમિયાન ખુલ્લા વિસ્તારોમાં કામ કરવાનું ટાળવાની સલાહ આપવામાં આવે છે.
