બિહાર પછી દેશભરમાં મતદાર યાદીઓના સ્પેશિયલ સઘન સુધારા (SIR)નો પ્રથમ તબક્કો મંગળવાર (28 ઓક્ટોબર, 2025) થી શરૂ થવાની ધારણા છે. ચૂંટણી પંચ (ECI) એ SIR ની જાહેરાત કરવા માટે સોમવારે એક બેઠક બોલાવી છે.
પ્રથમ તબક્કામાં રાજ્યોનો સમાવેશ
પ્રથમ તબક્કામાં આસામ, તમિલનાડુ, પુડુચેરી, કેરળ અને બંગાળનો સમાવેશ થશે, જ્યાં આવતા વર્ષે વિધાનસભાની ચૂંટણીઓ યોજાવાની છે. આ પછી ઉત્તર પ્રદેશ, મધ્યપ્રદેશ અને છત્તીસગઢ જેવા રાજ્યોમાં SIR હાથ ધરવામાં આવી શકે છે. ચૂંટણી પંચના વરિષ્ઠ અધિકારીઓના જણાવ્યા અનુસાર SIR કાર્ય સૌપ્રથમ એવા રાજ્યોમાં શરૂ થશે જ્યાં 2026 માં વિધાનસભાની ચૂંટણીઓ યોજાવાની છે.
ક્યારે પૂર્ણ થશે?
મતદાર યાદી સુધારણા કાર્ય આગામી માર્ચ સુધીમાં પૂર્ણ થશે. તે પછી SIR નો આગામી તબક્કો જાહેર કરવામાં આવશે. પહાડી રાજ્યો સહિત બાકીના રાજ્યોનો આમાં સમાવેશ કરવામાં આવશે.
SIR નો હેતુ શું છે?
SIR નો હેતુ મતદાર યાદીમાં સુધારો કરવાનો અને નવા મતદારો ઉમેરવાનો છે. આમાં નામોની ચકાસણી, હાલના મતદારોની ચકાસણી અને જરૂરી સુધારાઓનો સમાવેશ થશે. ચૂંટણી પંચના જણાવ્યા અનુસાર આ પ્રક્રિયા સંપૂર્ણપણે પારદર્શક અને ન્યાયી રહેશે. SIR હેઠળ મતદાર યાદીમાં ભૂલો સુધારવામાં આવશે અને ચૂંટણીમાં મહત્તમ ભાગીદારી સુનિશ્ચિત કરવા માટે નવા મતદારોનો સમાવેશ કરવામાં આવશે.
બંગાળમાં SIR પહેલા થઇ શકે છે આ નિમણૂંક
ECIના એક વરિષ્ઠ અધિકારીએ જણાવ્યું હતું કે પશ્ચિમ બંગાળમાં મતદાર યાદીઓના SIR દરમિયાન બૂથ-સ્તરના અધિકારીઓને મદદ કરવા માટે ચૂંટણી પંચ સ્વયંસેવકોની નિમણૂક કરી શકે છે. દરેક બ્લોકમાં સરકારી કર્મચારીઓમાંથી સ્વયંસેવકોની પસંદગી કરવામાં આવશે, અને આ કાર્ય ટૂંક સમયમાં શરૂ થઈ શકે છે. તેમણે જણાવ્યું હતું કે આ સહાયકો BLO ને નામાંકન ફોર્મ ભરવામાં મદદ કરશે. તેમણે વધુમાં જણાવ્યું હતું કે આ સ્વયંસેવકો મુખ્યત્વે 1,200 થી વધુ મતદારો ધરાવતા મતદાન મથકો પર તૈનાત કરવામાં આવશે.
