ભારત સરકાર દ્વારા દેશના કરોડો ખેડૂતોના આર્થિક ઉત્થાન માટે 'પ્રધાનમંત્રી કિસાન સન્માન નિધિ' (PM Kisan Samman Nidhi) યોજના અમલમાં મૂકવામાં આવી છે. આ યોજના હેઠળ પાત્ર ખેડૂતોને વર્ષમાં ત્રણ સમાન હપ્તા દ્વારા કુલ ₹6,000 ની નાણાકીય સહાય સીધી તેમના બેંક ખાતામાં જમા કરવામાં આવે છે. દરેક હપ્તા પેટે ખેડૂતોને ₹2,000 ની રકમ આપવામાં આવે છે. હાલમાં દેશભરના ખેડૂતો આ યોજનાના ૨૩મા હપ્તાની આતુરતાથી રાહ જોઈ રહ્યા છે.
કુલ 22 હપ્તા સફળતાપૂર્વક જાહેર કરાયા
અત્યાર સુધીની સ્થિતિ પર નજર કરીએ તો, સરકાર દ્વારા આ યોજનાના કુલ ૨૨ હપ્તા સફળતાપૂર્વક જારી કરી દેવામાં આવ્યા છે. જેમાં સૌથી છેલ્લો એટલે કે ૨૨મો હપ્તો ૧૩ માર્ચ, ૨૦૨૬ ના રોજ ખેડૂતોના ખાતામાં મોકલવામાં આવ્યો હતો. આ યોજનાની ખાસિયત એ છે કે સરકાર દ્વારા દરેક હપ્તો ચોક્કસ સમયાંતરે જારી કરવામાં આવે છે. નિયમ મુજબ, દર ચાર મહિનાના ગાળામાં એક હપ્તો ખેડૂતોને આપવામાં આવે છે.
23મા હપ્તાને લઇને ખેડૂતો માટે સારા સમાચાર
૨૩મા હપ્તાની રાહ જોતા ખેડૂતો માટે સારા સમાચાર છે. માર્ચ મહિનામાં ૨૨મો હપ્તો મળ્યા બાદ, આગામી ચાર મહિનાનો ગાળો હવે જૂન મહિનાના અંતમાં પૂર્ણ થઈ રહ્યો છે. આ ગણતરી મુજબ, એવી પ્રબળ શક્યતા છે કે સરકાર ૨૩મો હપ્તો જુલાઈ મહિનામાં રિલીઝ કરી શકે છે. જોકે, સરકાર દ્વારા હજુ સુધી કોઈ ચોક્કસ તારીખની સત્તાવાર જાહેરાત કરવામાં આવી નથી. કૃષિ વિભાગ અને પીએમ કિસાન પોર્ટલના સૂત્રો દ્વારા મળતી માહિતી મુજબ, જે ખેડૂતોના કેવાયસી (e-KYC) અને જમીનના રેકોર્ડનું વેરિફિકેશન પૂર્ણ છે, તેમને જ આ હપ્તાનો લાભ મળશે.
વેબસાઇટ પર જઇને સ્ટેટસ તપાસી લો
તેથી, ખેડૂતોને સલાહ આપવામાં આવે છે કે તેઓ અધિકૃત વેબસાઇટ પર જઈને પોતાનું સ્ટેટસ તપાસી લે અને જો કોઈ વિસંગતતા હોય તો તેને વહેલી તકે દૂર કરી લે, જેથી હપ્તો જારી થતી વખતે કોઈ મુશ્કેલી ન નડે. ૨૩મા હપ્તા અંગેની કોઈપણ અધિકૃત જાણકારી માટે ખેડૂતોએ માત્ર સરકારી પોર્ટલ અથવા તેમના નજીકના કોમન સર્વિસ સેન્ટર (CSC) ની મુલાકાત લેવી જોઈએ. આ યોજના ખેડૂતો માટે ખેતીના ખર્ચને પહોંચી વળવા માટે એક મજબૂત ટેકો સાબિત થઈ રહી છે.
આ પણ વાંચોઃ Health: આ લક્ષણોને હલકામાં ન લો! નહીં તો થઇ શકે છો આ ગંભીર બીમારી....
