પીએમ નરેન્દ્ર મોદી ગુરુવારે સાંજે 4 વાગ્યે નવી દિલ્હીના 'સેવા તીર્થ' ખાતે મંત્રી પરિષદની એક અત્યંત મહત્વપૂર્ણ બેઠકની અધ્યક્ષતા કરશે. એક વર્ષના લાંબા અંતરાલ બાદ યોજાનારી આ બેઠકમાં તમામ કેબિનેટ મંત્રીઓ, સ્વતંત્ર હવાલો ધરાવતા રાજ્ય મંત્રીઓ અને અન્ય તમામ રાજ્ય મંત્રીઓ અનિવાર્યપણે ઉપસ્થિત રહેશે. પીએમ મોદીના પાંચ દિવસના વિદેશ પ્રવાસથી પરત ફર્યા બાદ તરત જ બોલાવવામાં આવેલી આ બેઠકને કેન્દ્ર સરકારની મધ્ય-ગાળાની કામગીરીની મોટી સમીક્ષા તરીકે જોવામાં આવી રહી છે.
વિવિધ મંત્રાલયોની કામગીરી અને ભવિષ્યના રોડમેપની સમીક્ષા
આ હાઈ-પ્રોફાઈલ બેઠકમાં સરકારની મુખ્ય કલ્યાણકારી યોજનાઓ અને ઈન્ફ્રાસ્ટ્રક્ચર પ્રોજેક્ટ્સની પ્રગતિનું મૂલ્યાંકન કરવામાં આવશે. વિવિધ મંત્રાલયોના કાર્યપ્રણાલી, તાજેતરમાં લેવાયેલા મુખ્ય નિર્ણયો, તેના પરિણામો અને આગામી મહિનાઓ માટેના વહીવટી રોડમેપ પર વિસ્તૃત ચર્ચા થશે.
પશ્ચિમ એશિયાના સંકટ પર ખાસ નજર
હાલમાં ચાલી રહેલા પશ્ચિમ એશિયાના સંકટ અને તેના કારણે ઊભી થનારી આર્થિક અસરો વચ્ચે આ બેઠક પર સમગ્ર દેશની નજર છે. પીએમ મોદી આ વૈશ્વિક તણાવથી દેશના નાગરિકોને ઓછી અસુવિધા થાય તે માટે ઊર્જા, કૃષિ, ખાતર, ઉડ્ડયન, શિપિંગ અને લોજિસ્ટિક્સ જેવા મહત્વના વિભાગોને ખાસ દિશાનિર્દેશો આપી શકે છે. યુદ્ધ પ્રભાવિત લોકોની સમસ્યાઓ દૂર કરવા માટે પણ જરૂરી પગલાં લેવા સૂચના આપવામાં આવશે.
મંત્રીમંડળમાં ફેરબદલની તેજ થતી અટકળો
આ બેઠક એવા સમયે યોજાઈ રહી છે જ્યારે મોદી 3.0 સરકારના મંત્રીમંડળમાં મોટા ફેરબદલ અને વિસ્તરણની ચર્ચાઓ જોરશોરથી ચાલી રહી છે. જૂન 2024માં સત્તામાં આવેલી ત્રીજી મોદી સરકારની બીજી વર્ષગાંઠ નજીક છે, ત્યારે જૂનના બીજા અઠવાડિયામાં કેબિનેટમાં ફેરબદલ થવાની પ્રબળ સંભાવનાઓ વચ્ચે આ બેઠક વહીવટી અને રાજકીય રીતે અત્યંત નિર્ણાયક સાબિત થશે.
આ પણ વાંચો---- Gandhinagar : વિધાનસભા અધ્યક્ષ શંકર ચૌધરીએ 19 સમિતિઓ ગઠિત કરી, આ દિગ્ગજોને સોંપાઈ મહત્વની જવાબદારી
