નવી દિલ્હીમાં શનિવારે વડાપ્રધાન નરેન્દ્ર મોદીએ BJPની નવી રાષ્ટ્રીય ટીમ સાથે મુલાકાત કરી હતી. BJP અધ્યક્ષ નીતિન નવીને 17 ઓગસ્ટે 65 સભ્યોની નવી ટીમની જાહેરાત કર્યા બાદ આ પ્રથમ મુલાકાત હતી. બેઠક BJPના મુખ્યાલયમાં યોજાઈ હતી.
મુલાકાત બાદ PM મોદીએ સોશિયલ મીડિયા પર બેઠકની માહિતી આપી હતી. તેમણે કહ્યું કે સંગઠનની બેઠકોમાં નવા વિચારો અને નવા દૃષ્ટિકોણ સામે આવે છે. તેનો મુખ્ય હેતુ પાર્ટીને વધુ મજબૂત બનાવવાનો અને લોકો સાથે જોડાણ વધારવાનો છે. આ અગાઉ નીતિન નવીને પાર્ટીના નવા પદાધિકારીઓ સાથે બેઠક યોજી હતી. તેમાં સંગઠનની વ્યૂહરચના અને આગામી વિધાનસભા ચૂંટણીની તૈયારીઓ અંગે ચર્ચા કરવામાં આવી હતી. ખાસ કરીને ગ્રાઉન્ડ લેવલ પર સંગઠન મજબૂત બનાવવા અને સરકારની યોજનાઓનો લાભ લોકો સુધી પહોંચાડવા પર ભાર મૂકવામાં આવ્યો હતો.
BJP હવે યુવાનો સાથે સંપર્ક વધારવા માટે 'યુવા સંવાદ'ને પ્રાથમિકતા આપવાની તૈયારીમાં છે. પાર્ટીનું ફોકસ 14 વર્ષ અને તેથી વધુ ઉંમરના યુવાનો, ખાસ કરીને Gen Z અને Gen Alpha પર રહેશે. આ માટે દેશભરમાં વરિષ્ઠ નેતાઓની અલગ-અલગ ટીમો બનાવવાની તૈયારી છે. ભારતીય જનતા યુવા મોરચા આ અભિયાનમાં મદદ કરશે. BJPની નવી ટીમમાં પૂર્વ કેન્દ્રીય મંત્રી સ્મૃતિ ઈરાનીને પણ મહત્વપૂર્ણ જવાબદારી આપવામાં આવી છે. RSSની રાષ્ટ્રીય કાર્યકારિણીના સભ્ય રહી ચૂકેલા રામ માધવની પણ સંગઠનમાં વાપસી થઈ છે.
આ દરમિયાન બેઠકમાં 'વંદે માતરમ્'ને લઈને પણ પ્રસ્તાવ પસાર કરવામાં આવ્યો હતો. BJPએ કોંગ્રેસના કાર્યક્રમોમાં રાષ્ટ્રગીતની માત્ર પ્રથમ બે પંક્તિ ગાવાના નિર્ણયની ટીકા કરી હતી. BJPએ કહ્યું કે રાજકીય સુવિધા અથવા તુષ્ટિકરણ માટે રાષ્ટ્રગીતના સન્માન સાથે સમાધાન ન થવું જોઈએ. આગામી દિવસોમાં પાર્ટી ચૂંટણીને ધ્યાનમાં રાખીને સંગઠનને વધુ સક્રિય બનાવવાની દિશામાં આગળ વધશે.
આ પણ વાંચો : Abhijeet Dipke સહિત 5 લોકો સામે કેસ દાખલ, સરકારી શાળા પર દેખાડો કરવાના લગાવ્યા આરોપ