દિલ્હીના રામલીલા મેદાન ખાતે યોજાનારી કોંગ્રેસ પક્ષની મહારૅલીને લઈને દિલ્હી પોલીસ તંત્ર દ્વારા સુરક્ષાના અત્યંત વ્યાપક અને કડક પગલાં ભરવામાં આવ્યા છે. આ રૅલીમાં ખૂબ મોટી સંખ્યામાં કાર્યકરો અને લોકોના આવવાની સંભાવના ધ્યાને રાખીને દિલ્હી પોલીસ, કેન્દ્રીય સુરક્ષા દળો તેમજ અન્ય સુરક્ષા એજન્સીઓના સાત હજારથી વધુ જવાનો પરિસરમાં તહેનાત કરી દેવાયા છે.

સુરક્ષા વ્યવસ્થા અત્યંત કડક કરાઇ

રામલીલા મેદાનની અંદરથી લઈને આસપાસના તમામ રસ્તાઓ સુધી સુરક્ષા વ્યવસ્થા અત્યંત કડક અને મજબૂત કરવામાં આવી છે. આયોજન દરમિયાન વિશાળ ભીડને યોગ્ય રીતે નિયંત્રિત કરવા તેમજ કોઈપણ પ્રકારની અપ્રિય ઘટના બનતી અટકાવવા સમગ્ર મેદાનને 14 ઝોનમાં વહેંચવામાં આવ્યું છે. 

દરેક ઝોનની સીધી જવાબદારી એસીપી સ્તરના અધિકારીને સોંપાશે

આ વ્યવસ્થા હેઠળ મેદાનના દરેક ઝોનની સીધી જવાબદારી એસીપી સ્તરના અધિકારીને સોંપાશે, જ્યારે બે ઝોનની દેખરેખ એડિશનલ ડીસીપી સ્તરના અધિકારી કરશે. પરિસરમાં પ્રવેશ મેળવનારા પ્રત્યેક વ્યક્તિની મેટલ ડિટેક્ટરથી તપાસ થશે અને તપાસ વિના કોઈને પ્રવેશ મળશે નહીં. મુખ્ય પ્રવેશ અને નિકાસ દ્વારો પર પણ વધારાના પોલીસકર્મીઓ તહેનાત રહેશે.

ગઠબંધને 10 લાખ લોકો પહોંચવાનો મોટો દાવો કર્યો

આ રૅલી અંગે ઈન્ડિયા ગઠબંધને 10 લાખ લોકો પહોંચવાનો મોટો દાવો કર્યો છે, જ્યારે દિલ્હી પોલીસને આશરે 70 હજાર લોકો એકઠા થવાનો ઇનપુટ મળ્યો છે. આ ઇનપુટના આધારે જ સમગ્ર સુરક્ષા યોજના આખરી કરવામાં આવી છે. શનિવારે પોલીસ કમિશનર અનુરાગ કુમાર અને વિશેષ પોલીસ કમિશનર (કાયદો અને વ્યવસ્થા) દેવેશ ચંદ્ર શ્રીવાસ્તવે રામલીલા મેદાનની રૂબરૂ મુલાકાત લઈને સ્થિતિ તથા તૈયારીઓની સમીક્ષા કરી હતી. તેમણે ઉપસ્થિત અધિકારીઓને લોકોના પ્રવેશ અને નિકાસ માર્ગો પર વિશેષ સતર્કતા રાખવાના આદેશ આપ્યા હતા.

મેદાન અને આસપાસ 200થી વધુ સીસીટીવી કેમેરા લગાવવામાં આવ્યા

સુરક્ષા માટે મેદાન અને આસપાસ 200થી વધુ સીસીટીવી કેમેરા લગાવવામાં આવ્યા છે, જેના મારફતે કંટ્રોલ રૂમમાંથી પ્રત્યેક હિલચાલ પર સતત નજર રખાશે. આ ઉપરાંત ફરજ પરના પોલીસ જવાનો બોડી કેમેરાનો પણ ઉપયોગ કરશે. કોઈપણ કટોકટી સામે લડવા દંગા નિયંત્રણ વાહનો અને જરૂરી સરકારી ગાડીઓ તૈનાત રહેશે. 

પોલીસે આયોજકો પાસે માહિતી માગી

પોલીસે આયોજકો પાસેથી રૅલીમાં સામેલ થનારા લોકો, સ્વયંસેવકો અને બસોની સંખ્યા તેમજ સંપૂર્ણ વિગતો માંગી છે. આ સાથે જ આયોજકોને ભીડ નિયંત્રણ, સીસીટીવી લગાવવા, કંટ્રોલ રૂમ સ્થાપિત કરવા અને શિસ્તબદ્ધ રહેવાના કડક નિર્દેશ આપ્યા છે. તંત્રે માહોલ બગાડે તેવા ભાષણોથી બચવા અને મેદાનમાં રાત્રિ રોકાણ ન કરવા સ્પષ્ટ તાકીદ કરી છે. 


આ પણ વાંચો   :   PM Modi : પીએમ મોદીનું સંબોધન: ‘દિમાગી નક્સલ’ના ખતરાથી એલર્ટ રહેવાની જરૂર