આગામી બિહાર વિધાનસભા ચૂંટણી માટે રાજકીય ગતિવિધિઓ તેજ થઈ ગઈ છે. તમામ પક્ષોએ પોતાની રણનીતિઓ ઘડવાનું શરૂ કરી દીધું છે અને જનસમર્થન મેળવવા માટે પ્રયાસો કરી રહ્યા છે. દરમિયાન, ભાજપ હાઇકમાન્ડે શુક્રવારે નિર્ણય લીધો કે પક્ષ સંબંધિત તમામ ચૂંટણી નિર્ણયો પટનામાં લેવામાં આવશે.
બેઠક વહેંચણી ફોર્મ્યુલા પર નિર્ણય
ભાજપ બેઠક વહેંચણી ફોર્મ્યુલા અને પ્રચારથી લઈને ઉમેદવારોની પસંદગી સુધીના તમામ ચૂંટણી સંબંધિત નિર્ણયો પટનામાં લેશે. થોડા દિવસો પછી, કેન્દ્રીય ગૃહમંત્રી અમિત શાહ બિહાર જશે અને વ્યક્તિગત રીતે ચૂંટણી પ્રચારની જવાબદારી સંભાળશે.
નેતાઓ પટનામાં મળ્યા
નોંધનીય છે કે ગુરુવારે, અમિત શાહ અને નીતિશ કુમારની હાજરીમાં, ભાજપ અને જેડીયુ રાજ્ય એકમોના નેતાઓ પટનામાં મળ્યા હતા. આ બેઠકમાં બેઠક વહેંચણી ફોર્મ્યુલા પર ચર્ચા થવાની સંભાવના હતી. જોકે, બેઠકના પરિણામ પર કોઈએ ટિપ્પણી કરી નથી.
એનડીએ બિહારમાં પોતાનો કાર્યકાળ ચાલુ રાખવા માંગે છે
બિહાર વિધાનસભાની ચૂંટણી ઓક્ટોબર અથવા નવેમ્બરમાં યોજાવાની ધારણા છે. જોકે, ચૂંટણી પંચ (ECI) એ હજુ સુધી તારીખોની જાહેરાત કરી નથી. ભાજપ, જેડી(યુ) અને એલજેપીનો સમાવેશ કરતું એનડીએ બિહારમાં પોતાનો કાર્યકાળ ચાલુ રાખવા માંગે છે, જ્યારે આરજેડી, કોંગ્રેસ અને ડાબેરી પક્ષોનો સમાવેશ કરતું ઈન્ડિયા બ્લોક નીતિશ કુમારને સત્તા પરથી દૂર કરવા માંગે છે.
કોની પાસે કેટલી બેઠકો છે?
હાલની 243 સભ્યોની બિહાર વિધાનસભામાં, એનડીએ પાસે 131 ધારાસભ્યો છે, જેમાં ભાજપના 80, જેડી(યુ)ના 45, એચએએમ(એસ)ના 4 અને 2 અપક્ષનો સમાવેશ થાય છે. વિપક્ષી ઈન્ડિયા બ્લોકમાં 111 સભ્યો છે, જેમાં આરજેડીના 77 કોંગ્રેસના 19, સીપીઆઈ(એમએલ)ના 11, સીપીઆઈ(એમ)ના 2 અને સીપીઆઈના 2 સભ્યોનો સમાવેશ થાય છે.
