Pune Airport: ભારતીય વાયુસેનાના વિમાનનું હાર્ડ લેન્ડિંગ, રનવેને તાત્કાલિક બંધ કરવામાં આવ્યો

ઘટના બાદ રનવેને સાફ કરીને શક્ય તેટલી વહેલી તકે કામગીરી ફરી શરૂ કરવા યુદ્ધસ્તરે પ્રયાસો ચાલી રહ્યા છે.

શું થયું?

એરપોર્ટ અધિકારીઓ મુજબ, આ ઘટના રાત્રે લગભગ 10:25 વાગ્યે બની હતી. લેન્ડિંગ દરમિયાન લડાકૂ વિમાનનું લેન્ડિંગ ગિયર ફેલ થઈ ગયું, જેના કારણે વિમાન રનવે પર જ અટકી ગયું અને રનવે બ્લોક થઈ ગયો. એક પોલીસ અધિકારીએ જણાવ્યું કે વિમાનની હાર્ડ લેન્ડિંગ થયુ હતુ.

IAFની પુષ્ટિ

ભારતીય વાયુસેનાએ સોશિયલ મીડિયા પ્લેટફોર્મ ‘X’ પર જણાવ્યું કે પુણેનો રનવે વાયુસેનાના એક વિમાનનું હાર્ડ લેન્ડિંગ કરતા રનવેને તાત્કાલિક બંધ કરવામાં આવ્યો છે. એરક્રૂ સંપૂર્ણપણે સુરક્ષિત છે અને કોઈ નાગરિક સંપત્તિને નુકસાન થયું નથી.

વાયુસેનાના એર ટ્રાફિક કંટ્રોલ (ATC) મુજબ, રનવે સાફ કરીને સામાન્ય ઉડાન કામગીરી ફરી શરૂ કરવામાં લગભગ 4 થી 5 કલાક લાગી શકે છે.

ઉડાનો પર અસર અને મુસાફરોને તકલીફ

આ ઘટનાના કારણે હવાઈ ટ્રાફિક પર ભારે અસર પડી. ફ્લાઇટ ટ્રેકિંગ ડેટા મુજબ, પુણે આવતી ઓછામાં ઓછી 8 ઉડાનોને સુરત, ગોવા, નવી મુંબઈ, ચેન્નઈ અને કોયમ્બતૂર જેવા એરપોર્ટ પર ડાયવર્ટ કરવામાં આવી. મુસાફરોને વિલંબ અને રૂટ બદલાવનો સામનો કરવો પડ્યો.

કેન્દ્રીય મંત્રીનું નિવેદન

કેન્દ્રીય નાગરિક ઉડ્ડયન રાજ્ય મંત્રીએ પરિસ્થિતિ પર નજર રાખી અને રનવેના તાત્કાલિક બંધની પુષ્ટિ કરી. તેમણે જણાવ્યું કે રાહતની વાત એ છે કે એરક્રૂ સુરક્ષિત છે અને કોઈ નાગરિક સંપત્તિને નુકસાન થયું નથી. તમામ એરલાઇન્સને જાણ કરવામાં આવી છે અને રનવે ફરી શરૂ થવામાં લગભગ 5 કલાક લાગી શકે છે. તેઓએ વધુમાં જણાવ્યું કે પરિસ્થિતિને ઝડપથી સામાન્ય બનાવવા માટે તેઓ એરપોર્ટ અધિકારીઓ અને વાયુસેનાની ટીમ સાથે સતત સંપર્કમાં છે. 

આ પણ વાંચો: Weather Update: વરસાદથી રાહત, મધ્યપ્રદેશમાં હીટવેવનું હવામાન વિભાગનું એલર્ટ