મુંબઈના પ્રખ્યાત સિદ્ધિવિનાયક મંદિરમાં કથિત દાન કૌભાંડને લઈને મહારાષ્ટ્રમાં રાજકારણ ગરમાયું છે. તાજેતરમાં, મહારાષ્ટ્ર નવનિર્માણ સેના (MNS) ના વડા રાજ ઠાકરેએ દાવો કર્યો હતો કે મંદિરમાંથી ₹18 કરોડનું દાન ચોરાઈ ગયુ છે, જેનાથી અનેક પ્રશ્નો ઉભા થયા છે. આ બાબતની ગંભીરતાને ધ્યાનમાં રાખીને, સરકારે એક મહત્વપૂર્ણ નિર્ણય લીધો છે.

રોકડ, દાગીનાનુ ઓડિટ કરવાનો આદેશ

મહારાષ્ટ્રના નાયબ મુખ્યમંત્રી એકનાથ શિંદેએ છેલ્લા પાંચ વર્ષમાં મંદિરના દાન પેટીઓમાં મળેલા રોકડ અને સોના/ચાંદીના દાગીનાનું ઓડિટ કરવાનો આદેશ આપ્યો છે. આ પગલાથી મંદિર વહીવટીતંત્રમાં ખળભળાટ મચી ગયો છે. એવું માનવામાં આવે છે કે આ સરકારી કાર્યવાહીથી કથિત કૌભાંડમાં સામેલ અધિકારીઓ અને કર્મચારીઓ માટે ગંભીર પરિણામો આવી શકે છે.

રાજ ઠાકરેએ શું લગાવ્યા આરોપ ? 

મનસેના વડા રાજ ઠાકરેએ થોડા દિવસો પહેલા સિદ્ધિવિનાયક મંદિરમાં કૌભાંડનો આરોપ લગાવ્યો હતો. તેમણે દાવો કર્યો હતો કે મંદિરના દાન પેટીઓમાંથી વાર્ષિક આશરે ₹18 કરોડનો ગેરઉપયોગ અથવા ચોરી થઈ રહી છે. ઠાકરેએ એમ પણ કહ્યું હતું કે તેમણે આ મુદ્દા અંગે નાયબ મુખ્યમંત્રી એકનાથ શિંદેને પત્ર લખ્યો છે.

મનસેના વડાએ જણાવ્યું હતું કે પત્રમાં મંદિરના કર્મચારીઓ ચોરીમાં સામેલ હોવાનો આરોપ મૂકવામાં આવ્યો હતો. તેમણે નોંધ્યું હતું કે આ કર્મચારીઓ પકડાયા પછી સરેરાશ દાનની રકમમાં નોંધપાત્ર વધારો થયો હતો. તેમના પત્ર મુજબ, વાર્ષિક આશરે ₹18 કરોડની ઉચાપત થઈ રહી હતી, અને તેમણે આ બાબતની નિષ્પક્ષ તપાસ કરવાની હાકલ કરી હતી.

https://twitter.com/ANI/status/2084445497910268151

મંદિર ટ્રસ્ટનું શું કહેવુ છે? 

સિદ્ધિવિનાયક મંદિર ટ્રસ્ટે રાજ ઠાકરેના આરોપોને સ્પષ્ટપણે નકારી કાઢ્યા છે. ટ્રસ્ટના ચેરમેન સદા સર્વાંકર અને ટ્રસ્ટી રાહુલ લોંધેના જણાવ્યા અનુસાર, ટ્રસ્ટે પોતે મે મહિનામાં કાયદા અને ન્યાય વિભાગને પત્ર લખીને છેલ્લા પાંચ વર્ષથી મળેલા દાનના વિગતવાર ઓડિટની વિનંતી કરી હતી. ટ્રસ્ટે જણાવ્યું હતું કે અનિયમિતતાઓની જાણ થતાં, તેઓએ સૌપ્રથમ ભ્રષ્ટાચાર વિરોધી બ્યુરો (ACB) ના વડા વિશ્વાસ નાંગરે પાટિલ સમક્ષ ફરિયાદ નોંધાવી હતી, જેના પગલે મંદિરમાં પોલીસ કર્મચારીઓ તૈનાત કરવામાં આવ્યા હતા.

માર્ચમાં દાનપેટીમાંથી પૈસા ગાયબ થવાની ઘટના પ્રકાશમાં આવી હતી. CCTV ફૂટેજની તપાસ કર્યા પછી, કેટલાક કર્મચારીઓ નાના દાનપેટીમાંથી રોકડ કાઢતા પકડાયા હતા. સર્વાંકરે જણાવ્યું હતું કે પાછલી સમિતિના કાર્યકાળ દરમિયાન કરોડો રૂપિયાની ઉચાપત થઈ હતી, પરંતુ આ બાબતને એવી રીતે રજૂ કરવામાં આવી હતી કે વર્તમાન સમિતિ પર શંકા જાય છે. તેમણે સ્પષ્ટતા કરી હતી કે ભ્રષ્ટાચાર વિરોધી બ્યુરો (ACB) ની મદદથી ચોક્કસ કર્મચારીઓ દ્વારા દાનની રકમની ચોરીનો પર્દાફાશ થયો હતો. ત્યારબાદ, ટ્રસ્ટે કાયદા અને ન્યાય વિભાગ કે જે મુખ્યમંત્રી દેવેન્દ્ર ફડણવીસ પોતે સંભાળતા હતા. તેઓને નિષ્પક્ષ તપાસની માંગણી કરી હતી.

તેમણે ઉલ્લેખ કર્યો હતો કે નાયબ મુખ્યમંત્રી એકનાથ શિંદેને સંબોધિત એક પત્ર પણ તૈયાર કરવામાં આવ્યો હતો પરંતુ ક્યારેય મોકલવામાં આવ્યો ન હતો. આ પત્ર રાજ ઠાકરેના હાથમાં આવ્યો હતો, જેમણે પછી મીડિયાને અધૂરી માહિતી પૂરી પાડી હતી.

 ACB અધિકારીઓની દેખરેખ હેઠળ દાનની ગણતરી- મંદિર ટ્રસ્ટ 

સર્વાંકરે સમજાવ્યું હતું કે તપાસ દરમિયાન દાનની રકમની ગણતરી ACB અધિકારીઓની દેખરેખ હેઠળ કરવામાં આવી હતી, જેના કારણે મુખ્ય આરોપી રાજન પેંડુલકર સહિત નવ વ્યક્તિઓની ધરપકડ કરવામાં આવી હતી. અત્યાર સુધીમાં નવ ધરપકડ કરવામાં આવી છે અને આ કેસના સંદર્ભમાં 46 કર્મચારીઓને સસ્પેન્ડ કરવામાં આવ્યા છે. તેમણે ઉમેર્યું હતું કે આ મામલાની CID તપાસની માંગ પણ ઉઠાવવામાં આવશે.

ટ્રસ્ટ જણાવે છે કે, દાનની ચોરી ઉપરાંત, ઓનલાઈન ચુકવણી દ્વારા VIP દર્શનની સુવિધા આપતા રેકેટ અને નેટવર્ક તેમજ ફૂલ વિક્રેતાઓ અને ટેક્સી ડ્રાઈવરો દ્વારા અનધિકૃત પ્રવેશની વ્યવસ્થા કરનારાઓ સામે કાર્યવાહી કરવામાં આવી છે. મંદિર વહીવટીતંત્રના જણાવ્યા અનુસાર, આવી બધી પ્રવૃત્તિઓ હવે બંધ કરી દેવામાં આવી છે.

સદા સર્વાંકરે આરોપ લગાવ્યો હતો કે ધરપકડ કરાયેલા કેટલાક કર્મચારીઓના ભૂતપૂર્વ ટ્રસ્ટ બોર્ડ અને શિવસેના (ઉદ્ધવ બાળાસાહેબ ઠાકરે) જૂથ સાથે સંકળાયેલા વ્યક્તિઓ સાથે જોડાણ હતું. જોકે, આ આરોપોની સ્વતંત્ર રીતે ચકાસણી કરવામાં આવી નથી.

આ પણ વાંચો: Dharmendra Pradhan Resign: ધર્મેન્દ્ર પ્રધાને શિક્ષણમંત્રી પદેથી આપ્યુ રાજીનામુ